Modern.az

Jurnalistlərin yol problemi - Gərək maşın kimisə öldürsün, sonra həll olunsun?..

Jurnalistlərin yol problemi - Gərək maşın kimisə öldürsün, sonra həll olunsun?..

Media

15 Sentyabr 2017, 12:24

Deyirlər dərzi öz yamağını tikə bilmir. Elə jurnalistlər də başqalarının dərdinə əlac tapa bilsə də, sıra öz probleminə çatanda durğunluq yaranır.

Məsələn, jurnalistlərin Bibiheybətdəki binası ərazisindəki yol problemi hələ də qalır. Söhbət  həmin yolda hər hansı zolaq və ya işarənin olmamasından gedir. Başqa vaxt sözünün kəsərindən istifadə edənlər, nədənsə şikayətlərini dilə gətirməkdən çəkinirlər. Təbii, istisnalar qaydaları pozmur.

Həmin yolda qarşı tərəfdəki dayanacağa getmək üçün sakinlər sürətli qaçmaq və ya maşınların azaldığı vaxtı gözləmək məcburiyyətindədirlər.

Maraqlıdır, jurnalistlər nə zamana kimi bu cür təhlükə ilə üz-üzə qalacaqlar?

Bakı Nəqliyyat Agentliyinin ( BNA) İctimai əlaqə və maarifləndirmə şöbəsinin müdiri Mais Ağayev Modern.az-a deyib ki, rəsmi qurum olaraq  problemlə bağlı öz təkliflərini irəli sürüblər:

“Jurnalistlər binasının ərazisi ilə bağlı həmkarlarımız bizə müraciət etmişdi. Bundan sonra əməkdaşlarımız əraziyə baxdı. Əslində həmkarlar dayanacağa getmək, evlərə rahat gedişi təmin etmək üçün  həmin ərazidə piyada zolağının çəkilməsini istəyirlər. Sadəcə, həmin yolun təyinatı elədir ki, orada piyada zolağı ola bilməz. Sürətli yol olduğu üçün bu, düzgün deyil. Bu səbəbdən Bakı Nəqliyyat Agentliyi orada yaşayan əhalinin rahatlığını təmin etmək üçün Nazirlər Kabineti Yol Hərəkətinin Təhlükəsizliyi Komissiyasına müraciət etdi. Ərazidə yerüstü piyada keçidinin tikilməsi ilə bağlı təklif verildi və bu, Komissiya tərəfindən müsbət dəyərləndirildi. Bizim işimiz bununla bitmiş sayılır. Artıq tikintiyə nə zaman vəsait ayrılacaq, iş nə zaman başlayacaq - bu haqda məlumatlı deyiləm. Bu haqda yeni informasiya olanda bildirəcəm”.

M.Ağayev deyib ki, ərazidə yaşayan əhali sadəcə səbr etməlidir:

“İstər piyada keçidi ilə bağlı yol nişanı, istərsə də zolaq qoyulması mümkün deyil. Çünki yol nişanı ilə zolaq təyinatı eyni şeydir. Yolun təyinatına görə müəyyən hissədə maşınların sürətini azaltması düzgün hesab olunmur. Bu səbəbdən bir qədər səbr etmək lazımdır ki, ərazidə yerüstü piyada keçidi inşa edilsin”.

Whatsapp
Bizə yazın!
Keçid et
Hərbi gəmilər döyüşə hazır vəziyyətə gətirildi