Tanınmış hərbi reportyor Vahid Mustafayev yeni çapdan çıxmış “Bulağıstan. Yaddaş” kitabının təqdimatı mərasimi keçirilib.
Modern.az-ın məlumatına görə, kitabda 2007-ci ildə yazılmış “Bulağıstan” povesti və 2010-cu ildə yazılmış “Yaddaş” romanı yer alıb. Hər iki əsər Qarabağ mövzusunu əhatə edir.
“Bulağıstan”da susuzluq girdabında qovrulan bir kəndin faciəsi təsvir edilib: insanlar kəndi tərk etməyə başlayır, yalnız övladları Qarabağda şəhid olmuş Naxış xala və Rəhim kişi getmirlər. Onlar şəhid övladlarının məzarını susuz qoymurlar.
“Yaddaş” romanında isə müəllif Birinci Qarabağ müharibəsində doğma kəndə hücum etmiş erməni-rus birləşmələrinin qarşısını almağa çalışan dörd gəncdən bəhs edir. Onlardan biri ölümcül yaralanır. 17 ildən sonra komadan ayılmış Azər keçmişini xatırlamaq üçün yola çıxır…
Təqdimat zamanı çıxış edən Vahid Mustafayev bil dirib ki, bu kitabın yazılmasına ehtiyac vardı:
“Çünki bizdə də oxucular müharibənin iştirakçısı olmuş müəllifin gözləri ilə savaş səhnələri görməli idilər”.
Vahid Mustafayev çıxışında şahidi olduğu hadisələri qələmə aldığını, həm də rejissor kimi lentə köçürdüyünü bildirib:
“Qarabağ hadisələri barədə film çəkmək istəyəndə biz müharibənin iştirakçısı olmuş müəlliflərin real hadisələri təsvir edən əsərlərinə əsaslanmaq istədlik. Rus ədəbiyyatında yetərincə belə müəlliflər var - Boris Polevoy, Mixail Şoloxov. Amma Azərbaycan ədəbiyyatında beləsini tapa bilmədik. Buna görə real hadisələri qələmə almağa məcbur olduq”.
Kitaba ön sözü yazmış yazıçı Sabir Rüstəmxanlı çıxışında Vahid Mustafayevin yaradıcısı olduğu ANS telekanalını xatırlayıb: “Bu gün Vahid Mustafayev Azərbaycan nəsri üçün doğuldu. Gəlişi ilə o, həm də savaş nəsrinin əsasını qoydu. 25 il qabaq o, Azərbaycan televiziyası üçün doğulmuşdu. Onda o, bütün postsovet məkanında ilk müstəqil televiziyanın əsasını qoymuşdu. Heç kimi bu faktı dana bilməz ki, ANS keçmiş SSRİ məkanında ilk müstəqil telekanaldır. Bütün sovet respublikalarından ANS-ə gəlib təcrüblərini öyrənirdilər. Ümid edirəm ki, bu belə davam etməyəcək və ANS yenidən işə başlayacaq”.
Kitabın təqdimatında kitabın naşiri Rasim Müzəffərli, tanınmış jurnalist Mir Şahin, İbrahim Nəbioğlu, rejissor Vasif Babayev və başqaları çıxış ediblər.
