Sumqayıt Şəhər Polis İdarəsi 4-cü Polis Bölməsinin əməkdaşları tərəfindən vətəndaşlardan və nəqliyyat vasitələrindən oğurluq hallarına qarşı uğurlu tədbirlər həyata keçirilib.
DİN-dən Modern.az-a bildirilib ki, keçirilmiş əməliyyat-axtarış tədbirləri nəticəsində sentyabrın 13-də Seymur Qurbanova məxsus mobil telefonu oğurlamaqda şübhəli bilinən şəhər sakini, əvvəllər məhkum olunmuş Seymur Məmmədov tutulub. Ətrafında aparılan tədbirlərlə onun bu ilin iyun-avqust ayları ərzində şəhər ərazisində daha 3 nəfərin mobil telefonlarını oğurlaması da müəyyən edilib.
Keçirilmiş daha bir tədbir zamanı oktyabrın 10-da və 13-də şəhər ərazisində 4 avtomobildən akkumulyator, təkər və mobil telefon oğurlamaqda şübhəli bilinən Bakı şəhər sakinləri Elməddin Əliyev və Cəbrayıl Babayev tutulublar.
Avqustun 28-də Qazax rayon sakinləri Paşa Əyyubov və qardaşı Həsən Rayonyun Fərəhli kəndi ərazisindəki otlaq sahəsindən 5 baş inəklərinin oğurlanması barədə verilən məlumatla əlaqədar Rayon Polis Şöbəsinin əməkdaşları tərəfindən keçirilən əməliyyat-axtarış tədbirləri nəticəsində oğurluğu törətməkdə şübhəli bilinən Cəlilabad rayon sakinləri Əziz Əliyev və qardaşı Kainat tutulublar.
Qusar Rayon Polis Şöbəsi əməkdaşlarının keçirdikləri əməliyyat tədbirləri nəticəsində isə oktyabrın 15-nə keçən gecə Samur qəsəbəsindəki evlərdən birinin həyətindən 9 baş qoyunu oğurlamaqda şübhəli bilinən qəsəbə sakinləri Rəhim Butayev və Murad Məhsimov tutulublar.
Siyəzən Rayon Polis Şöbəsinin əməkdaşları tərəfindən cari il sentyabrın 10-dan oktyabrın 3-dək olan müddətdə rayon ərazisindəki 3 quşçuluq sexindən və 1 fermadan təmir-tikinti alətləri, inşaat materialları və 4900 metr elektrik naqili oğurlamaqda şübhəli bilinən şəhər sakini əvvəllər, məhkum olunmuş Elvin Bəydəmirov tutulub.
