Bu gün Milli Məclisin Səhiyyə komitəsinin sədr müavini, deputat Musa Quliyevin (Urud) doğum günüdür.
Modern.az-ın məlumatına görə, Musa Quliyev 1961-ci il noyabrın 25-də Qərbi Azərbaycanın Zəngəzur qəzası Sisyan rayonunun Urud kəndində anadan olub.
Burada orta məktəbi qızıl medalla bitirib (1978).
N.Nərimanov adına Azərbaycan Dövlət Tibb İnstitutunun müalicə-profilaktika fakultəsini (1984) və Azərbaycan Respublikasının Prezidenti yanında Dövlət İdarəçilik Akademiyasının dövlət və bələdiyyə idarəetməsi fakültəsini (2004) bitirib. Əmək fəaliyyətinə təyinatla göndərildiyi Gəncə şəhərində, A.Səhhət adına 1 saylı xəstəxanada həkim kimi başlayıb (1984-1985).
Gəncə Narkoloji dispanserində həkim-narkoloq (1986-1990), 7 saylı Bakı şəhəri poliklinikasında həkim nevropatoloq (1990-1993), Bakı şəhəri Yasamal rayonunda həkim əmək ekspert komissiyasında ekspert nevropatoloq (1993-1994), Əmək və Əhalinin Sosial Müdafıəsi Nazirliyində şöbə müdiri (1994-1997), idarə rəisi (1997-2000) vəzifələrində işləyib.
2000-2005, 2005-2010-cu illərdə ikinci və üçüncü çağırış Milli Məclisdə təmsil olunub. 2010-cu ildə 40 saylı Kəpəz ikinci (Gəncə) seçki dairəsindən dördüncü çağırış Milli Məclisə deputat seçilib. 2015-ci ildə keçirilən parlament seçkilərində də eyni dairədən deputat seçilib.
Azərbaycan Yazıçılar Birliyinin üzvü olan Musa Quliyev həm də Musa Urud imzası ilə şeirlər də yazır.
Evlidir, 3 övladı var.
Modern.az olaraq təbriklərə qoşulur və şair-deputata uzun ömür, can sağlığı arzu edirik.
