Söyləyir ki, mən doğulanda evimizdə şənlik var idi. Hansısa qonaqlıq olub. Atam da deyib ki, bir halda belə bir xoş gündə oğlum dünyaya gəlib, adını qoyuram - Xoşbəxt…
Ömründə bir dəfə ərizə yazıb, o da işə qəbul olunanda. Bütün həyatını neft sənayesinə həsr edib, yüzlərlə neft yatağının tapılmasında xüsusi xidməti var…
…Bir başqa aləmdir, yaşının az qala bir əsr olmasına baxmayaraq, onunla ünsiyyətdə adam özünü gənc kimi hiss edir. Ötən əsrin 60-cı illərinin bakılı gəncləri kimi yerli ləhcəylə danışır. Bu onu daha da sevdirir. Hər söhbətində bir məzə, bir şirinlik var. Deyir ki, bu yaşa gəlib çatmışamsa elə xoşbəxtəm ki, xoşbəxt…
Azərbaycan neftinin gələcəyi üçün isə “kim deyir neftimiz tükənəcək, yalan söbətdir, neftimiz olub, var, olacaq da”...
O, 1930-cu il yanvarın 14-də Bakının Pirşağı kəndində dünyaya gəlib. 1947-ci ildə orta məktəbi bitirərək indiki Azərbaycan Dövlət Neft və Sənaye Universitetinin geoloji-kəşfiyyat fakültəsinə daxil olub. Oranı 1952-ci ildə "Neft və qaz yataqlarının geologiyası və kəşfiyyatı" üzrə bitirərək "dağ mühəndisi-geoloq" ixtisasına yiyələnib.
Əmək fəaliyyətinə elə həmin il SSRİ Neft Sənayesi Nazirliyinin Bakıdakı "Dövlətxüsusineftlayihə" kontorunda başlayıb, lakin az sonra o vaxt təzə təşkil olunmuş ”Dənizneft” Birliyində işə qəbul olunub. Burada böyük mühəndis və bölmə rəisi vəzifələrində çalışıb. 1954-cü ilin mart ayında “Gürganneft” trestinin (indiki “Neft Daşları” NQÇİ) birinci mədəninin böyük geoloqu vəzifəsinə təyin edilib və o vaxtdan da dəniz neft yataqlarının kəşfiyyatı və işlənilməsinin məşhur iştirakçılarından və rəhbərlərindən biri kimi tanınmaqdadır.
2004-cü ildən Prezidentin sərəncamı ilə Azərbaycan Respublikası Dövlət Neft Şirkətinin geologiya, geofizika və yataqların işlənməsi üzrə birinci vitse-prezidentidir…
...O, Xəzərə bağlıdır, Xəzər də ona. Bütün ömrü boyu dənizdə çalışıb, dənizlə dostluq edib. Dəniz ona inanıb, öz sirlərini ona açıb, neft yataqlarının yerini ona pıçıldayıb...
Deyir ki, adam gərək ad günündə bir az səliqəli geyinsin, telefon zənglərinə hazır olsun. “Amma öz aramızdır, deyilən xoş sözlər adma ləzzət eləyir, yaşadığına çox sevinirsən”...
Bəli, bu gün, yanvarın 14-də Xoşbəxt Yusifzadənin 89 yaşı tamam olur. Bu qosqoca nefçiyə, şirin, məzəli, düşündürən söhbətləri ilə ürəkləri fəth edən ağsaqqalımıza möhkəm can sağlığı, ağrı-acısız günlər arzulayırıq.
89 yaşınız mübarək, ey dünyanın xoşbəxti, Xoşbəxt müəllim!..
Elman Eldaroğlu,
ABŞ, Miçiqan
