Bu gün Bakı Ağır Cinayətlər Məhkəməsində hakim Əlövsət Abbasovun sədrliyi ilə Nardaran hadisələrinə görə həbs edilən “Müsəlman birliyi” adlanan təşkilatın sədri Taleh Bağırov, Azərbaycan Xalq Cəbhəsi Partiyası sədrinin müavini Fuad Qəhrəmanlı və digərlərinin cinayət işi üzrə məhkəmə prosesi davam etdirilib.
Modern.az-ın xəbərinə görə, prosesdə ifadə verən Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin baş əməliyyat müvəkkili Kənan Heybətov bildirib ki, əməliyyat zamanı təqsirləndirilənlərdən Bəhruz Əsgərovu zərərsizləşdirib: "Əməliyyat keçirildi. Bəhruzun əlində qumbara və beşbarmaq var idi. Mən onu zərərsizləşdirəndə yaralı idi. Güllə yarası almışdı. Baldırının arxa hissəsindən güllə dəymişdi. Onu əlbəyaxa döyüş üsulu ilə yerə yıxıb zərərsizləşdirdim.
Mən Bəhruz Əsgərovu hədəfə alıb atəş açmışam. Amma bilmirəm mən vurmuşam, ya yox. Əməliyyat zamanı 6 güllə atmışam. Amma onun Bəhruza dəyib-dəymədiyini bilmirəm. Əməliyyatda 20 polis iştirak etmişik. Əlavə qüvvə cəlb edilməyib. Əməliyyat zamanı barrikada qurmamışıq".
Vəkil Yalçın İmanovun suallarını cavablandıran K.Heybətov bildirib ki, ola bilsin sonradan əməliyyata əlavə qüvvə cəlb edilib. Amma o əməliyyatda əvvəlcə 20 polis iştirak edib. Yaralıların təcili-tibbi yardımla xəstəxanaya yola salındığını deyən K.Heybətov bildirib ki, hadisə zamanı mənəvi zərər çəkib: "Hadisədən sonra bir müddət özümə gələ bilmədim. Çox stress keçirmişəm".
Təqsirləndirilən şəxs B.Əsgərov bildirib ki, hadisə zamanı ona rezin güllələr dəyib, həqiqi güllədən xəsarət almayıb.
Proses fasilədən sonra davam etdiriləcək.
Xatırladaq ki, T.Bağırov və təşkilatın digər üzvləri Cinayət Məcəlləsinin 120-ci (qəsdən adam öldürmə) maddəsinin 120.2.1, 120.2.3, 120.2.4, 120.2.7, 120.2.12, 29,120-ci (qəsdən adam öldürməyə cəhd) maddəsinin 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-cü (qanunsuz olaraq odlu silah əldə etmə), 228.4-cü (qanunsuz olaraq silah gəzdirmə) və digər maddələri ilə ittiham olunur. Həmin şəxslər ötən il noyabrın 26-da hüquq-mühafizə orqanlarının əməkdaşlarının Bakının Nardaran qəsəbəsində keçirdikləri xüsusi əməliyyat zamanı saxlanılıblar.
F.Qəhrəmanlı isə ötən il dekabrın 8-də həbs edilib. Məhkəmə onun barəsində 3 ay müddətinə həbs qətimkan tədbiri seçib. O, Cinayət Məcəlləsinin 281 (dövlət əleyhinə açıq çağırışlar), 283-cü (milli, irqi, sosial və ya dini nifrət və düşmənçiliyin salınması) və 220.2-ci (hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) maddələri ilə ittiham olunur.
Ağa AKİFOĞLU
