“Qaynar xətt” xidmətləri vətəndaşın dövlət orqanı ilə əlaqə saxlamasına, istənilən məsələyə dair şikayət, təklif və iradını bildirməsinə kömək edir. Əhalinin müraciətlərinə operativ surətdə baxılması üçün son vaxtlar əksər dövlət qurumlarında belə xidmətlərin yaradılması təqdirəlayiq haldır. Bəs həmin xidmətlər necə işləyir, nə qədər müraciətlər daxil olur?
Modern.az-ın əməkdaşı suala cavab almaq üçün bir neçə nazirliklə əlaqə saxlayıb.
Daxili İşlər Nazirliyinin “102 zəng xidməti”nə son iki ay ərzində 7251 müraciət daxil olub. Müraciətlərin məzmunu isə daha çox məişət zəminlidir. Bu barədə Modern.az-a Daxili İşlər Nazirliyinin mətbuat xidmətinin şöbə rəisi Orxan Mansurzadə məlumat verib. Onun sözlərinə görə, vətəndaşların qəbulu, onların ərizələrinə vaxtında baxılması, həmin müraciətlərdə qaldırılan məsələlərin operativ həlli daxili işlər orqanlarının gündəlik fəaliyyətində proritet istiqamətlərindən biridir. “Ümumilikdə Daxili İşlər Nazirliyində vətəndaşların ərizə və şikayətlərinə baxılması, onların qəbulu məsələlərinə xüsusi önəm verilir. Təsadüfi deyil ki, bu məsələ özü nazirliyin kollegiya iclasının gündəliyinə salınıb. Müşavirələrdə geniş müzakirə olunub. Elə bir içlas, müşavirə olmaz ki, bununla bağlı polis rəislərinə müəyyən xatırlatmalar olmasın, onların diqqətinə çatdırılmasın”.
O.Mansurzadə bildirib ki, ötən il Daxili İşlər Nazirliyində 4 mindən çox vətandaş qəbul edilib. Bu göstərici isə 2009-cu illə müqayisədə 10% çoxdur. DİN rəsmisinin sözlərinə görə, əvvəlki illərdə nazirliyin rəhbərliyi tərəfindən qabaqcadan elan verilməklə bir sıra bölgələrdə vətəndaşların qəbulu prosesi də həyata keçirilib. Bu praktika özünü doğrultmaqla yerlərdən yuxarı instansiyalara göndərilən ərizə və şikayətlərin azalmasına müsbət təsir edib, bir çox məsələlər yerindəcə öz həllini tapıb.
O.Mansurzadə eyni zamanda bildirib ki, vətəndaşlar müxtəlif hüquqpozmalar, kiriminal xarakterli məlumatlar, polis fəaliyyəti ilə bağlı istənilən məsələ ilə əlaqədar sutka ərzində «102 zəng mərkəzi»nə müraciət edə bilərlər. Onun sözlərinə görə, ötən il “102 xidməti”nə 42 minə yaxın müxtəlif xarakterli məlumat daxil olub. Bunlar yol nəqliyat hadisələrinı, müxtəlif hüqüqpozmaları, vətəndaşların üzləşdiyi digər problemləri əhatə edir. Bunlardan 1679-u üzrə cinayət işi başlanıb, məişət zəminli 2 minə yaxın hüquqazidd əməlin isə qarşısı alınıb.
O.Mansurzadənin sözlərinə görə, qaldırılan bütün məsələlər nəzarətə götürülərək əksəriyyəti yerində müsbət həll olunub.
“Nətiçələr barədə təşəbbüskarlara yazılı cavablar verilib. Onların hüquqları izah edilib. Vətəndaşlar birbaşa nazirlikdə və ərazi polis orqanlarında qəbul olunurlar”.
O.Mansurzadə bildirib ki, “102 xidməti”ndən əlavə, vətəndaşlar nazirliyin veb-saytında birbaşa müraciət ünvanlaya bilərlər. Onun sözlərinə görə, bu ilin iki ayı ərzində 544 müraciət, ötən il isə 2280 müraciət daxil olub. Müraciətlər əsasən kadr məsələsi, istindaq və xidmət sahələrini əhatə edib.
“Nazirliyin veb-saytına birbaşa elektron müraciətlər mövcuddur ki, orada vətəndaşlar polisin fəaliyyətinə aid və aid olmayan müxtəlif məsələlərlə bağlı birbaşa müraciət edə bilərlər. Bu müraciətlərə də yazılı cavablar verilir.
Qeyd etmək lazımdır ki, Prezident İlham Əliyevin 30 iyun 2004-cü ildə «Azərbaycan Respublikasında polis orqanlarının fəaliyyətinin təkmilləşdirilməsinə dair» təsdiqlədiyi Dövlət Proqramında yeni informasiya texnologiyalarının tətbiqi geniş yer tutur. Vətəndaşlar və polis əməkdaşları arasında operativ rabitənin təşkili məqsədi ilə «102 zəng mərkəzi»nin yaradılması da həmin proqramın tərkib hissəsidir. “102» ilk olaraq Bakı və Sumqayıt şəhərlərini, Abşeron yarmadasını, daha sonra isə bütün ölkə ərazisini əhatə etdi. Ümumilikdə, həyata keçirilən bütün tədbirlərin məqsədi xalqa xidmət etməli olan polis əməkdaşları ilə vətəndaşlar arasında münasibətləri inkişaf etdirmək, hakimiyyət təmsilçisi kimi polisin ictimaiyyət arasında nüfuzunu daha da yüksəltməkdir».
İqtisadi İnkişaf Nazirliyinin “qaynar xətti”nə 7800 müraciət daxil olub. Bu barədə nazirliyin mətbuat xidmətinin rəhbəri Abbas Əliyev məlumat verib. Onun sözlərinə görə, müraciətlər daha çox korporativ idarəetmə, iqtisadiyyat, dövlət investisiyaları, xariçi iqtisadi əlaqələr, xarişi ticarət siyasəti və bu kimi sahələri əhatə edib. İqtisadi İnkişaf Nazirliyinin “qaynar xətti” 195-2–dir.
Vergilər Nazirliyinin “qaynar xətt” xidmətinə yanvar ayı ərzində 28101 müraciət daxil olub. Nazirliyin Analitik informasiya mərkəsindən verilən məlumata görə, nazirliklə canlı əlaqə və avtomatik əlaqə qurmaq mümkündür. Müraciətlərin çoxu avtomatik rejimdə qəbul olunub. Analitik informasiya mərkəsinin məlumatına görə, avtomatik rejimə daxil olan müraciətlərin 19,1%-i büdcə və vergi borcu, 80,9 %-i digər vergi məsələlərini əhatə edir.
Nazirliklə canlı bağlantı quraraq ünvanlanan sualların 41%-i elektron xidmətlər, 28,1%-i hesabat və bəyyannamələrin doldurulması, 13,2%-i vergi növlərini, 5,8%-i qeydiyat məsələlərini əhatə edir.
Nazirliyin “qaynar xətti” olan 195-ə şikayət və ərizələr də daxil olur. Yanvar ayı ərzində 15 ərizə, 4 şikayət daxil olub. Analitik informasiya mərkəzinin məlumatına görə, ərizələr və şikayətlər araşdırılır və həllinə çalışılır.
Mətbuat xidmətinin məlumatına görə, nazirliyin eyni zamanda sms – səsli və yazılı xidməti də var. Vətəndaşlara yanvar ayı ərzində 33 min 644 sms göndərilib. Mobil telefonlar vasitəsi ilə 21 min 311 yazılı sms, şəhər telefonlarına isə 12 min 263 səsli sms göndərilib.
Sədaqət SÜLEYMANOVA
