Millət vəkili, siyasi elmlər üzrə fəlsəfə doktoru Qənirə Paşayevanın və "Şərq" qəzetinin baş redaktoru, tədqiqatçı jurnalist Akif Aşırlının həmmüəllifi olduğu "Ermənilərin törətdiyi soyqırımın qurbanı - Bağanıs Ayrım" kitabı Türkiyə turkcəsində çap edilib. Kitab erməni silahlı birləşmələrinin keçmiş sovet ordusunun köməyi ilə 1990-cı il martın 23-dən 24- nə keçən gecə Qazax rayonunun Bağanıs Ayrım kəndində törətdikləri soyqırım faktlarından bəhs edir. Qeyd edək ki, kitap 2010-cu ildə ingilis dilində çap edilərək bir sıra xarici ölkələrdə yayılmış və maraqla qarşılanmışdır. Türkiyə türkcəsində nəşr olunmuş "Ermənilərin törətdiyi soyqırımın qurbanı - Bağanıs Ayrım" kitabının yaxın vaxtlarda Türkiyənin bir sıra şəhərlərində təqdimatı keçiriləcəkdir. Bundan sonra kitablar bu ölkənin millət vəkillərinə, ictimai-siyasi xadimlərinə, KİV-nə, qeyri-hökumət təşkilatlarına, universitetlərə və kitabxanalara paylanılacaq.
Kitabda 1990-cı il martın 24-də erməni silahlılarının keçmiş sovet ordusuna məxsus hərbi texnikadan, müasir silahlardan istifadə edərək Qazax rayonunun Bağanıs Ayrım kəndinə hücum etməsindən, mülki əhalinin insanlığa sığmayan işgəncələrlə qətlə yetirilməsindən, diri-diri ocaqda yandırılmasından bəhs olunur.
Qazax rayonunun Bağanıs Ayrım kəndi 1990-cı ilin martın 23-dən 24-ə keçən gecə qabaqcadan təşkil edilən plan əsasında hücuma məruz qalmış və martın 24-ü səhər saatlarında ermənilər tərəfindən işğal olunmuşdur. İşğal zamanı Bağanis Ayrım kəndinin əli silahsız, günahsız əhalisinə qarşı tarixdə görünməmiş divan tutulub. Onlarla insan qətlə yetirilib və yaralanıb.
Kənddə həmin gün 17 ev qumbaraatanla dağıdılıb, 11 ev isə quldurcasına qarət edilmişdir. Faciə zamanı Əsliyevlər ailəsinin 5 üzvü işgəncələrlə qətlə yetirildikdən sonra üstlərinə benzin tökülərək yandırılıb. Alməmməd Məhərrəmov həyətindəki ot tayasına atılaraq diri-diri ocağa qalanıb. Qətlə yetirilən insanların böyüyü 75 yaşında Dədəş Əsliyev, ən kiçiyi isə beşikdə olan 39 günlük Hafiz olub. Bağanıs Ayrım kəndi 1990-cı il avqust ayının 20-də Ermənistan hərbi birləşmələri tərəfindən tamamilə işğal edilib və yandırılıb.
"Ermənilərin törətdiyi soyqırım qurbanı - Bağanıs Ayrım" kitabında burada törədilmiş soyqırım faktlarını oxuculara çatdırır. Qeyd edək ki, kitabda əksini tapan faktlar istintaq materiallarından götürülmüşdür. Kitabda müəlliflərin soyqırımın şahidləri ilə söhbətləri və şahidlərin xatirələri öz əksini geniş şəkildə tapmışdır. Kitabın baş məsləhətçisi, Azərbaycan Respublikasının Baş prokrorunun müavini, Respublikanın hərbi prokuroru Xanlar Vəliyevdir.
Kitabın çap olunmasında məqsəd beynəlxalq ictimaiyyəti ermənilərin Azərbaycanın Dağlıq Qarabağ bölgəsi ilə yanaşı, Azərbaycanın Ermənistanla həmsərhəd olan digər bölgələrində(Qazax rayonunda) törətdikləri işğalçılıq və soyqırım siyasəti barədə daha geniş məlumatlandırmaqdır. Kitabın həmmüəllifi, millət vəkili Qənirə Paşayeva bu barədə öz fikirini daha dəqiq və konkret ifadə edir: “Kitab vasitəsiylə dünyaya Bağanıs Ayrım soyqırımını çatdırmaq istəyirik. Çünki bəzən elə təsəvvür yaranır ki, Ermənistan təkcə Qarabağ və ətraf rayonlarda soyqırım törədiblər. Lakin Ermənistan dövləti, onun silahlı qüvvələri Qazax rayonunun yeddi kəndini işğal ediblər. Bu kitabda erməni vandalizmi konkret sənədlər, faktlar və fotomateriallarla sübut olunur.
Kitabda Bağanıs Ayrım soyqırımının şahidlərinin, ailəsi soyqırıma məruz qalanların ifadələri də yer alıb".
Modern.az
