Noyabrın 17-də Bakının Binəqədi rayonundakı 2 nömrəli evtikmə kombinatının ərazisində 369 məcburi köçkün ailəsi üçün inşa olunmuş doqquzmərtəbəli yaşayış binası istifadəyə verilib. Prezident İlham Əliyev mərasimdə iştirak edib.
Binanın tikintisinə 2008-ci ildə başlanıb. Obyektin sifarişçisi Məcburi Köçkünlərin Sosial İnkişaf Fondudur. Binanın yerləşdiyi ümumi ərazi 3 hektar, tikintinin ümumi sahəsi isə 27 min 897 kvadratmetrdir.
AzərTAc xəbər verir ki, ərazidə məcburi köçkün ailələrinin mənzil-məişət şəraitinin yaxşılaşdırılması məqsədilə hər biri 63 mənzilli doqquzmərtəbəli beş, 54 mənzilli bir yaşayış binası və 260 şagird yeri olan məktəb binası tikilib. Bu mənzillərin 81-i bir, 180-i iki, 90-ı üç, 18-i isə dördotaqlıdır.
Yaşayış binasının ətrafında abadlıq və yaşıllaşdırma işləri aparılıb.
Binada qazanxana, nasosxana, transformator yarımstansiyası tikilib, mənzillər rabitə, su və qaz xətləri ilə təchiz olunub.