Modern.az

“WhatsApp”la dezinformasiya yayanlara cinayət işi açılacaq - Fuad Muradov ictimaiyyətə MÜRACİƏT ETDİ  

“WhatsApp”la dezinformasiya yayanlara cinayət işi açılacaq - Fuad Muradov ictimaiyyətə MÜRACİƏT ETDİ   

26 Yanvar 2018, 15:49

Son vaxtlar müxtəlif sosial şəbəkələr vasitəsilə azyaşlıların və onların valideynlərinin narahatlığına səbəb olan məlumatlar paylaşılır. Analoji hal yanvarın 25-də də qeydə alınıb. Belə ki, "WhatsApp" messenceri vasitəsilə insanlara məktəblərin həyətlərində şagirdlərə konfet formasında narkotik vasitələrin paylanıldığı barədə məlumat göndərilib. Həmin məlumatda deyilir ki, Bakının 23 saylı orta məktəbində şagirdlərə belə "konfet"lər paylanılıb. Ağızda şişərək partlayan bu vasitələrin digər məktəblərdə də şagirdlərə paylanılması təhlükəsinin qaldığı bildirilir. Eyni zamanda, həmin “konfet”lərin tərkibində narkotik vasitə olduğu iddia edilir.


Təhsil Nazirliyinin İctimaiyyətlə əlaqələr sektorunun müdiri Cəsarət Valehov Modern.az-a orta məktəblərin həyətlərində şagirdlərə konfet formasında narkotik vasitələrin paylanılması barədə yayılan məlumatlara münasibət bildirərkən deyib ki, belə məlumatların heç bir əsası yoxdur, “bu, cəfəngiyyatdır". 

 

Milli Məclisin Gənclər və idman komitəsinin sədri Fuad Muradov da Modern.az-a açıqlamasında narahatlığını dilə gətirib. Deputat müvafiq dövlət qurumlarının məsələni nəzarətə götürdüyünü açıqlayıb:

“Hesab edirəm ki, belə yalan və insanların narahatlığına səbəb olan dezinformasiyaların yayılması ciddi qanun pozuntusudur. Qanunvericiliyə uyğun olaraq, həmin xəbəri paylaşan insanlar məsuliyyətə cəlb ediləcək. Həmin məsuliyyətə uyğun barələrində cinayət işi açılacaq və cəzalandırılacaqlar”.

 


Komitə sədrinin sözlərinə görə, əvvəllər də Azərbaycana, azərbaycanlılara qarşı ciddi təxribatlar olub. Budəfəki hərəkətlər də həmin təxribatların tərkib hissəsidır:


“Bu cür dezinformasiyaların yayılması gənclərimizin psixologiyasını mənfi təsir altında qoyur və onların başqa səmtə yönləndirilməsinə səbəb olur. Eyni zamanda, gənclərin diqqətini yayındırır və asudə vaxtlarının səmərəli istifadəsinə mane olur.

Hazırda məsələ xüsusi dövlət qurumlarının diqqətindədir. Qeydə alınan faktlarla bağlı cinayət işi açılacaq”.

Deputat Modern.az vasitəsilə azyaşlılara və onalrın valideynlərinə də müarciət edib:

“Mən məktəblilərə, tələbələrə, valideynlərə bu cür informasiyalara soyuqqanlı yanaşmağı tövsiyə edirəm. Mətbuat nümayəndələrindən xahiş edirəmki, bu cür faktların dərhal ictimailəşdirilməsinə yardımçı olsunlar”. 

Instagram
Gündəmdən xəbəriniz olsun!
Keçid et
Əskipara kəndinə getmək istəyən jurnalistlər belə saxlanıldı