Modern.az saytı Milli Məclislə, deputatlarla bağlı məsələləri daim gündəmdə saxladığından son günlər poçtumuza seçicilərdən xeyli müraciət daxil olur ki, öz deputatları ilə əlaqə saxlaya, onların qəbuluna yazıla bilmirlər. Modern.az-ın əməkdaşı məsələ ilə bağlı Milli Məclislə əlaqə saxlayıb. Qanunverici orqanının Vətəndaşların qəbulu və müraciətləri ilə iş şöbəsindən bildirilib ki, iyulun 15-dən etibarən Milli Məclisdə vətəndaşların qəbulu dayandırılıb. Bunun səbəbi isə millət vəkillərinin yay tətilinə çıxmaları ilə əlaqədardır.
“Azərbaycan Respublikası Milli Məclisinin Daxili Nizamnaməsinin 1-ci maddəsinə müvafiq olaraq Milli Məclis iyul ayının 15-dən avqust ayının 30-dək tətilə buraxılıb.
Bununla əlaqədar iyul və avqust aylarında Milli Məclisdə vətəndaşların qəbulu təşkil olunmayacaq. Milli Məclisin payız sessiyası öz işinə sentyabr ayının 30-da başlayacaq”-deyə qanunverici orqanının Vətəndaşların qəbulu və müraciətləri ilə iş şöbəsinin açıqlamasında bildirilib.
Yeri gəlmişkən, tətilə çıxan deputatlardan bəziləri Modern.az-a açıqlamalarında yay istirahətini ölkə daxilində, digərləri xaricdə keçirəcəklərini bildirblər. Tətilə çıxmalarına baxmayraq, bu günlərdə də seçicilərilə görüşlər keçirdiklərini deyən millət vəkilləri də var.
Modern.az