Modern.az

Xocalının “Böyüməyən uşaqlar”ı Ukraynada səhnələşdirilir  

Xocalının “Böyüməyən uşaqlar”ı Ukraynada səhnələşdirilir   

Ədəbi̇yyat

15 Fevral 2019, 09:48

“Bir il olar ki, “Böyüməyən uşaqlar” kitabının səhnələşdirilməsinə hazırlıq gedir. Fevralın 22-də tamaşa nümayiş olunacaq. Ssenari Elşad Eyvazlının “Böyüməyən uşaqlar” kitabının əsasında yazılıb. Ukraynanın “Çornıy kvadrat”  teatrı tamaşanı səhnəyə qoyacaq”.   


Bunu Modern.az-a açıqlamasında Ukrayna Azərbaycanlıları Birləşmiş Diasporunun sədri Hikmət Cavadov deyib.

Onun sözlərinə görə, kitab əsasında çox maraqlı ssenari yazılıb:

“Kitab əsasında ssenarinin yazılması və səhnələşdirilməsi ideyası  müavinim Murad Cəfərovdan gəlib. Layihənin rəhbəri isə mənəm. Ssenarinin üzərində xeyli çalışmışıq. Düşünürəm ki, Xocalı faciəsi haqqında məlumatları ukraynalılara bu formada çatdırmaq daha məqsədəuyğundur. Eyni zamanda, tamaşada Ukrayna hadisələri ilə bağlı məqamlar da olacaq. Səhnədə əsas qəhrəmanlardan biri hər iki valideynini itirən 25 uşaqdan biridir. O Ukraynaya köçsə də, bəxtinə Ukrayna müharibəsinin də qurbanı olmaq düşüb. Bu tamaşa ilə əlaqədar peşəkar səviyyədə televiziya çəkilişi olacaq”.

Hikmət Cavadov bildirib ki, bu, onların ilk layihəsi deyil:

“Bu layihə Diasporla İş üzrə Dövlət Komitəsinin dəstəyi ilə həyata keçirilir. Diasporla İş üzrə Dövlət Komitəsinin Azərbaycan gerçəkliklərinin tanıdılması istiqamətində bu tip layihələrə dəstək verməsi təqdirəlayiqdir. Belə layihələrin xarici ölkələrdə xarici vətəndaşlara təqdim edilməsi bir mesajdır. Zənnimcə, dünyanın bir çox ölkələrində bu cür layihələrin keçirilməsi ilə istədiyimizə nail ola bilərik. Bu layihə keçən ildən Ukraynada müzakirə olunaraq ukrayn dilinə tərcümə olunub. Bu, bizim birinci layihəmiz deyil. “Cəhənnəmi görmüş pilot” filmi də bir neçə ildir ki, xarici ölkələrdə təqdim olunur”.

Qeyd edək ki, Parlament Jurnalistləri Birliyinin sədri Elşad Eyvazlının “Böyüməyən uşaqlar” kitabı  Heydər Əliyev Fondunun vitse-prezidenti Leyla Əliyevanın başlatdığı “Xocalıya Ədalət” kampaniyası çərçivəsində çap olunub.

Kitab bir neçə dilə, o cümlədən ingilis, alman, türk, gürcü, ukrayn dilinə tərcümə olunub və dünyanın bir çox ölkəsində təqdimatı keçirilib. Kitabda Xocalıda hər iki valideynini itirmiş uşaqların yaşadığı dəhşətli olaylar təsvir olunub.

Telegram
Hadisələri anında izləyin!
Keçid et
Əskipara kəndinə getmək istəyən jurnalistlər belə saxlanıldı