Ötən gecə Bakı Olimpiya stadionunda Avropa Liqasının final matçı keçirildi. “Çelsi” klubunun 4:1 hesabı ilə “Arsenal”ı məğlub etdiyi matç bir çox tarixi rekordları ilə yadda qalıb.
Modern.az həmin rekordlar toplusunu təqdim edir.
1. Avropa Liqasının final matçında ən çox tamaşaçı 1999-cu ildə “Marsel” və “Parma” klubları arasında oyun zamanı müşahidə olunmuşdu. Həmin matçı 62 min seyrçi izləmişdi. “Arsenal” və “Çelsi” arasındakı dünənki matça isə 52 mindən artıq azarkeşin toplaşdığı məlumdur.
- Bakı finalı finallarda ən çox qol vurulan matç kimi də tarixə düşdü. Bundan əvvəlki rekord 2006-cı ildə “Sevilya” - “Midlsboro” (4:0) arasındakı matça aid idi.
- “Arsenal” AvroLiqanın finalında 2-ci dəfə uğursuzluqla üzləşdi. Bundan əvvəl klub 1999-cu ildə “Qalatasaray”a matç sonrası penaltilərdə məğulb olmuşdu.
- ”Çelsi” ilə yanaşı, ingilis klublarından “Liverpul” bu turniri 3 dəfə, “Tottenhem” və “İpsviç” 2 dəfə, “Mançester Yunayted” isə 1 dəfə qazanıb.
- AvroLiqanın qalibi olaraq “Çelsi” 6,5 milyon avro, “Arsenal” isə 3,5 milyon avro mükafat alacaq.
- ”Arsenal”ın baş məşqçisi Unan Emeri “Sevilya” klubu ilə 3 dəfə AvroLiqa kubokunu qazanıb. Bakıdakı uğursuz finala baxmayaraq, o, italyan Covanni Trapatoni ilə birlikdə bu turnirin ən uğurlu baş məşqçisi sayılır.
- ”Çelsi”li Eden Azar matçda dubla imza atdı. Ona qədər Avto Liqa finallarında yalnız 10 futbolçu belə uğura imza ata bilib.
- Turnirin ən məhsuldar qoleadoru fransız Olivye Jiru olub. 32 yaşlı “Çelsi”li hücumçu ilə yanaşı, meydanda mübarizə aparan Koselni, Kanye və Lyakazet də fransız mənşəli oyunçular idi.
