“Bizim məqsədimiz Türkiyə ilə münasibətləri pozmaq deyil”.
APA-nın xəbərinə görə, bunu ABŞ dövlət katibi Mayk Pompeo Türkiyəyə səfərindən öncə “Fox News” telekanalına müsahibəsində deyib.
O bildirib ki, əsl məqsəd Suriya münaqişəsinin həlli yollarını tapmaqdır: “Türkiyə NATO-nun üzvüdür. Bizim təhlükəsizlik sahəsində ümumi maraqlarımız var”.
Danışıqlar aparmaq üçün ABŞ-ın vitse-prezidenti Mayk Penslə birgə Türkiyəyə gedəcəyini xatırladan M. Pompeo qeyd edib ki, səfər zamanı Türkiyə Prezidenti Rəcəb Tayyib Ərdoğanla görüşəcəyinə ümid edir.
O vurğulayıb ki, ABŞ Prezidenti Donald Tramp danışıqların yüksək səviyyədə aparılmasını vacib hesab edir.
Qeyd edək ki, Modern.az-ın məlumatına görə, bu gün Türkiyə Prezidenti Rəcəb Tayyib Ərdoğan “SKY News” müxbirinin “ABŞ-ın nümayəndə heyəti buraya (Türkiyəyə-red.) gəlir. Narahatsınız? Onlarla nə barədə danışacaqsınız?” sualına cavabında “Mən dimdik ayaqdayam. Niyə narahat olmalıyam? Onlarla görüşməyəcəyəm. Onlarla öz mövqedaşları görüşəcək. Mən Tramp gələndə onunla görüşəcəyəm” - deyib.