Bu gün insanların bir çoxu səhəri saatların dəyişməsi xəbəri ilə açıb. Çünki smartfon telefonlarda olan saatlarla adi mexaniki saatlar arasında vaxt fərqi meydana gəlib.

Məsələ burasındadır ki, 2016-cı ilədək oktyabrın sonuncu bazar günü ölkə ərazisində qış vaxtına keçid reallaşdırılırdı. Smartfonların saatı avtomatik olaraq 1 saat geri çəkməsi də bununla əlaqaədar olub.

Modern.az xatırladır ki,  Nazirlər Kabinetinin qərarına əsasən, bir neçə ildir ki, Azərbaycan qış vaxtına keçid ləğv olunub.

Bu gün səhər isə bir çox vətəndaşlar telefonlarında saatın avtomatik bir saat geri  çəkilməsi problemi ilə qarşılaşıblar. Bu hal xüsusilə də smartfonlarda qeydə alınıb.

Nəticədə kimisi yatıb qalaraq işə, kimisi səfərə çıxmağa, başqa biri hansısa mənzil başına gecikib.

Belə hadisələr bu ilin martında da yaşanmışdı...

Mütəxəssislər bildirir ki, bu, bəzi mobil cihazlarda mövcud olan vaxt proqramının yenilənməməsi ilə bağlıdır.

Ekspertlər bildirir ki, artıq mobil cihazında bir dəfə vaxt çaşqınlığı yaşayanlar diqqətli olmalı və vaxtla bağlı olan proqrama daxili dəyişiklik etməlidirlər.

Qeyd edək ki, 2016-cı ilə qədər Azərbaycan gün işığından səmərəli istifadə etmək üçün mart ayının son bazar günü saatı bir saat irəli və oktyabr ayında isə bir saatı geriyə çəkirdi. Əqrəblərin irəli və geri çəkilməsi hər il mart və oktyabr aylarının sonuncu bazar günü həyata keçirlirdi.

Ancaq 2016-cı ildən başlayaraq Azərbaycan höküməti insanlarda çaşqınlıq yaratdığına və tibbi olaraq bəzi sağlıq problemlərinə səbəb ola biləcəyini əsas gətirərək, bu təcrübədən istifadə etməkdən imtina edib.

Azərbaycandan fərqli olaraq, bu gün bəzi ölkələrdə qış vaxtına keçid həyata keçirilib.

A.Qorxmaz