2019-cu ilin başlanğıcından dünyanın 26 ölkəsində 75 KİV əməkdaşı öldürülüb.
Modern.az "Report"a istinadən xəbər verir ki, bu barədə "Press Emblem Campaign" qeyri-hökumət təşkilatının illik məruzəsində deyilir.
Vurğulanır ki, bu, əvvəlki illə müqayisədə azdır. 2018-ci ilin analoji dövründə dünyada 113 nəfər qətlə yetirilib. Təşkilat bununla yanaşı qeyd edib ki, 2019-cu ildə xeyli jurnalist yaralanıb, həbs edilib, təhdidlərə və hücumlara məruz qalıb.
Bu il həlak olan jurnalistlərin sayı üzrə siyahıda birinci üç yerdə Meksika (bu ölkədə 13 KİV əməkdaşı həlak olub), Əfqanıstan (8 jurnalist) və Pakistan (8 nəfər) qərarlaşıb. Siyahıda sonrakı yerlərdə Suriyanın (6 media mənsubu), Hondurasın (5 nəfər) və Filippinin (4 nəfər) adları qeyd edilib. Jurnalistlərin həlak olduqları ölkələrin arasında həmçinin Ukraynanın, Böyük Britaniyanın, Hindistanın, Braziliyanın, Haitinin, İndoneziyanın və başqa ölkələrin adları var.
Təşkilatın məlumatına görə, son 10 il ərzində dünyada ümumilikdə 1174 KİV işçisi qətlə yetirilib.
