Anadolu Agentliyinin (AA) Misirdə saxlanılan nümayəndəsi Türkiyəyə qayıdıb.
Modern.az Anadolu Agentliyinə istinadən xəbər verir ki, türk vətəndaşı Hilmi Balcı bu gün səhər saatlarında ölkəsinə qayıdıb. Təyyarə ilə İstanbula eniş edən H.Balcını agentliyin nümayəndələri qarşılayıb. Balcı son 3-4 gün ərzində xeyli yorulduğunu deyib:
“Prezidentimiz, xarici işlər nazirimiz və agentliyimizin rəhbəri Şenol bəy mənim tez bir zamanda qayıtmağım üçün əlindən gələni etdilər. 3-4 gün ərzində yorulmuşam, amma Şükürlər olsun ki, məsələ tez həll olundu və artıq vətəndəyəm”.
Qeyd edək ki, yanvarın 14-də “Anadolu” agentliyinin Misirdəki ofisinə polis basqını nəticəsində 4 jurnalist bilinməyən səbəblərdən saxlanılaraq naməlum istiqamətə aparılıb. ABŞ Xarici İşlər Nazirliyi, BMT, Beynəlxalq Jurnalistlər Federasiyası kimi qurumlar Misir polisini bu addımından dolayı qınayıb.
