Konstitusiya Məhkəməsinin hakimi İsa Nəcəfovin qalmaqal doğura biləcək yeni kitabı nəşr olunub.
Modern.az saytı xəbər verir ki, “Qanun” nəşriyyatında buraxılan “Acı həqiqət” adlı kitabda 1990-cı illərdə Azərbaycanın mövcud ictimai-siyasi mənzərəsi təsvir edilib.
Müəllif həmin dövrdə ölkədəki kriminogen durumu, dövlət idarəçiliyi orqanlarındakı vəziyyəti, cinayətkarlıqla mübarizəni təsvir edib. Faktlara, cinayət işi materiallarına söykənən bu əsərdə mərhum Prezident Heydər Əliyevin, eləcə də dövlət idarəçiliyində çalışmış bir çox məsul şəxslərin bədii obrazları yaradılıb.
Sənədli povestin əsas qəhrəmanları sırasında sabiq daxili işlər naziri Ramil Usubov, keçmiş baş prokuror Eldar Həsənov, eks-milli təhlükəsizlik naziri Namiq Abbasov və digər yüksək vəzifələr tutmuş məmurlar da yer alır.
Müəllif hakimiyyət strukturlarında baş verən intriqalar, danosbazlıq, xəbərçilik, korrupsiya əməliyyatları, hüquq-mühafizə orqanlarının kriminal aləmlə əlaqələri, sifarişli həbslər və sifarişli qətllər barədə yazıb.
“Acı həqiqət” kitabının səs-küy doğuracağı, qalmaqala səbəb olacağı gözlənilir.
Xatırladaq ki, İsa Nəcəfov 1995-ci ildən 2000-ci ilədək Azərbaycan Respublikası Baş Prokurorunun birinci müavini vəzifələrində işləyib.
22 mart 2002-ci ildə Milli Məclisin qərarı ilə Azərbaycan Respublikası Konstitusiya Məhkəməsinin hakimi vəzifəsinə təyin edilib. 6 aprel 2012-ci ildə Milli Məclisin qərarı ilə yenidən Konstitusiya Məhkəməsinin hakimi vəzifəsinə təyin edilib.
O, bir neçə kitab müəllifidir.
A.Qorxmaz
