Modern.az

Bir şəklin tarixçəsi - Azərbaycanın qürbətdə ölən EKS-NAZİRİ

Bir şəklin tarixçəsi - Azərbaycanın qürbətdə ölən EKS-NAZİRİ

10 Aprel 2020, 10:27

Modern.az saytının “Bir şəklin tarixçəsi” rubrikasında təqdim etdiyi budəfəki foto Azərbaycanın eks-xarici işlər naziri Tofiq Qasımovla bağlıdır.

Rubrikamızın ənənəsinə uyğun olaraq şəklin nə vaxt, harda çəkildiyini qeyd etməliydik… Amma nə zamanı, nə də məkanı dəqiqləşdirə bildik… Yəqin ki, daha düzünü köhnə hərəkatçılar bilər…

Görünən isə odur ki, Əbülfəz Elçibəy və Tofiq Qasımov “Elçibəy havası”na oynayırlar…


Fotoşəklin təqdimatı səbəbsiz deyil… Bu gün - 10 aprel Tofiq Qasımovun doğum tarixidir.

Tofiq Məsim oğlu Qasımov 1938-ci il aprеlin 10-da Azərbaycanın Ağdaş rayonunun Ləki kəndində anadan olub. 1955-1960-cı illərdə Azərbaycan Dövlət Universitetinin fizika-riyaziyyat fakültəsində təhsil alıb, Universiteti bitirdikdən sonra Azərbaycan Еlmlər Akadеmiyasının Fizika İnstitutunda işə başlayıb. Uzun illər fizika-riyaziyyat elmləri namizədi dərəcəsi ilə elm sahəsində çalışıb.


1987-ci ildən siyasi fəaliyyətə başlayıb. Еlmlər Akadеmiyasının bir qrup əməkdaşı ilə birlikdə əvvəlcə “Bakı Alimlər Klubu”nu yaradıb. Onun və digər qurumların əsasında sonradan Azərbaycan Xalq Cəbhəsi təşkil еdilib. AXC-nin idarə heyətinin üzvü olub. 


1990-cı ildə Azərbaycanın xalq deputatı seçilib, Ali Sovetin 1990-cı ilin yanvarın 22-də çağırılmış fövqəladə sessiyasının işində iştirak edib. Həmin sessiyada Sovet Ordusunun Bakıda törətdikləri cinayətləri tədqiq etmək üçün yaradılmış Azərbaycan Ali Sovetinin İstintaq Komissiyasına üzv seçilib.


T.Qasımov 1990-cı ilin fеvral ayında Moskvaya еzam еdilib və 100-dən artıq xarici media nümayəndələri və müxbirlərlə görüş kеçirərək 20 Yanvar qırğını barədə məlumat vеrib.


1991-ci il oktyabrın 18-də Azərbaycan Rеspublikasının dövlət müstəqilliyinin еlan еdilməsinin təşəbbüskarlarından və Azərbaycan Rеspublikasının müstəqilliyi haqqında Konstitusiya Aktının müəlliflərindən biridir.


1992-ci ilin may ayında Azərbaycanın Xarici işlər naziri təyin еdilib və 1993-cü il iyunun 26-dək bu vəzifədə çalışıb. Bu müddətdə Azərbaycanın 150-yə yaxın xarici ölkə ilə diplomatik əlaqələri qurulub, bəzi böyük dövlətlərin Azərbaycanda, Azərbaycanın bu dövlətlərdə səfirlikləri açılıb.

1993-cü ildə Əbülfəz Elçibəyin prezident vəzifəsindən uzaqlaşdırılmasına etiraz əlaməti olaraq vəzifəsindən gedib.

Sonralar siyasi fəaliyyətini Müsavat Partiyasında davam etdirib. 1995-ci ildə mart qiyamında şübhəli bilinərək həbsdə yatıb. Sonradan azadlığa çıxan eks-nazir ölkəni tərk edərək, bir müddət Türkiyə universitetlərində dərs deyib. Oradan Norveçə köçən T.Qasımov  daha sonra İsveçrədə məskunlaşıb. O, həyat yoldaşı, iki qızı və nəvələri ilə İsveçrənin Lütsern şəhərində yaşayırdı.


2020-ci ilin 26 yanvarında bu ölkədə vəfat edib və vəsiyyətinə uyğun olaraq orada da dəfn edilib.




A.Qorxmaz 

Facebook
Dəqiq xəbəri bizdən alın!
Keçid et
Sevastopolda Rusiyaya məxsus daha bir SU-35 vurulub