Modern.az-ın “Bir şəklin tarixçəsi” rubrikasının növbəti təqdimatında Azərbaycan ictimai-siyasi mühiti üçün bu gün əlçatmaz olan ibrətamiz bir səhnə açılır.
Tarix 3 iyul 1995-ci il.., məkan “Sinema-klub”...
Azərbaycan Milli İstiqlal Partiyasının yaranmasının 3-cü ildönümü münasibətilə təntənəli qəbul.
Müxalifət partiyasının əziz gününə Azərbaycan Respublikası Prezident Aparatının (o vaxt belə adlanırdı-red.) rəhbəri Ramiz Mehdiyev şəxsən təşrif buyurub. Onu PA ictimai-siyasi şöbəsinin müdiri Əli Həsənov müşayiət edir. AMİP sədri Etibar Məmmədov isə təbrikləri qəbul edir.
Özü də cənab Mehdiyev əliboş gəlməyib, o bir azdan Azərbaycan Respublikasının prezidenti Heydər Əliyevin müxalifət partiyasına göndərdiyi təbrik məktubunu oxuyacaq.
İndi – üstündən illər keçəndən sonra iqtidar-müxalifət münasibətlərindəki hədsiz gərginliyi, qütblərdə təmsil olunan insanlar arasında kəskin uçurumu görəndə ilk ağıla gələn sual bu olur: Kimdən və nədən oldu?
