Avropa Mərkəzi Bankından müjdə: dünya iqtisadiyyatı tədricən dirçəlməyə başlayır. Modern.az xəbər verir ki, bu barədə açıqlamanı Bankın prezidenti Jean-Claude Trichet verib. Onun sözlərinə görə, daha çox inkişaf etməkdə olan ölkələrin iqtisadiyyatında irəliləyiş hiss olunur. Lakin bu ölkələrdə inflyasiya riskləri də artır.
Qlobal maliyyə böhranının episentrlərindən olan ABŞ-da da müsbət tendensiya müşahidə olunmaqdadır. Ağ Evin iqtisadi müşaviri Kristina Romerin sözlərinə görə, ABŞ iqtisadiyyatında inkişaf müşahidə olunur. Romer qeyd edib ki, Obama administrasiyası daha artıq inkişaf görmək istəyir. O əlavə edib ki, prezident təsiri olan iqtisadi stimullaşdırmanı davam etdirməyi planlaşdırır.