“İran monarxistləri cəmiyyəti” təşkilatı bu gün Tehranda bomba partlayışı zamanı həlak olmuş tanınmış nüvə fiziki Məsud Əli Məhəmmədinin həyatına qəsdə görə məsuliyyəti öz üzərinə götürüb. Modern.az-ın İTAR-TASS-a istinadən verdiyi məlumata görə, bu barədə təşkilatın bəyanatında bildirilib.
İranın “Fars” agentliyi də təşkilatın bəyanatını yayıb. Agentlik bildirir ki, təşkilatın üzvləri Tehranda prezident seçkilərindən sonra müxalifətin küçə yürüşlərində fəal iştirak ediblər. Onlar yürüş iştirakçılarına partlayıcı maddələri necə hazırlmaq, istifadə etmək barədə təlim keçiblər. Bundan əlavə, onlar müxalifət tərəfdarlarını təxribat hərəkətlərinə təhrik edidbər. Bu fakt iğtişaş iştirakçılarının məhkəməsi zamanı məlum olub.
İran monarxistləri öz qarşılarına İranın islam rejimini devirmək və ölkədə dünyəvi dövlətin bərqərar olmasını, İran monarxiyasının bərpasını məqsəd qoyub.
Qeyd edək ki, partlayışa görə molla rejimi İsrail və ABŞ-ı ittiham edib. Ağ ev isə bu bəyanatı cəfəng adlandırıb.