General-mayor Polad Həşimovun, polkovnik İlqar Mirzəyevin “Tovuz döyüşləri”də qəhrəmancasına həlak olması, ölkəmizdə illərdir formalaşan “ön cəbhəyə ancaq əsgərlər gedir” stereotipini darmadağın etdi. Onların ölümü göstərdi ki, ön cəbhədə əsgərlərlə yanaşı, məhz yüksək rütbəli zabitlər də döyüşür. Əsgərlər səngərdə onunla birgə olan komandiri heç vaxt unutmur, necə ki, general-mayor Polad Həşimovu, polkovnik İlqar Mirzəyevi untumurlar.
"Vətən uğrunda canından keçməyə hazır olan oğullarımız çoxdur"
Bu barədə Modern.az-la fikirlərini bölüşən ehtiyatda olan polkovnik Şair Ramaldanov bildirib ki, vətən uğurunda kasıb-dövlətli, əsgər-zabit, yaxud general ayrı-seçkiliyi yoxdur:
“Vətən oğlu elə Vətən oğludur. Vətən uğrundan canından keçməyə hazır olan oğullarımız çoxdur. Hələ bu qətiyyətli əsgərlə bir səngərdə general, polkovnik varsa, bu ordu heç basılmaz.
Erməni tərəfin Tovuzla sərhəddə törətdiyi hərbi təxribat zamanı həm orudumuzun, həm cəmiyyətin, həm xalqın potensialını, həm də Azərbaycan Silahlı Qüvvələrinin Ali Baş Komandanı, Prezident İlham Əliyevin qətiyyətliliyini gördük. Bunlar hamısı bir-birini tamamladı.
Təəssüf ki, bu proseslərdə bəzi ünsürlərin ortaya çıxmasını, qışqıran-bağıran, amma bir iş görə bilməyənləri, ordunu nüfuzadan salmaq istəyənləri, daxildə təxribat törətmək istəyənləri, Milli Məclis binasına girib o biabıçılıqla düşməni bizə güldürmək arzusunda olanları, sosial şəbəkələrdə yerli-yersiz danışıb düşmən dəyimanına su tökənləri, informasiya müharibəsində onlara materiallar vermək istəyənləri də gördük.
Döyüş və bu kimi situsiyalar cəmiyyəti sınayır. Bizim cəmiyyətimiz “Aprel döyüşləri”ndəki kimi sınaqdan çox uğurla çıxır. Doğrudur, bu, savaşdır, təxribatın qarşısının alınması ilə bağlıdır. Biz aprel hadisələrində irəliləyib düşmənin mövqelərini ələ keçirmişdiksə, orada müəyyən dinamika vardı. Burada isə mövqe döyüşləridir, nə biz onların dövlət sərhədlərini pozub irəliləməyi qarşımıza məqsəd qoymuşuq, nə də düşmənə öz təxribatını genişləndirməyə imkan veririk ki, strateji mövqeləri ələ keçirsin”.
General əsgərin yanındadırsa...
Ş.Ramaldanovun sözlərinə görə, cəbhədəki son vəziyyət göstərdi ki, bizim zabitlər rütbəsindən asılı olmayaraq, vəziyyəti yerində araşdırırlar:
“Qəbul edilən qərarların düzgün olub-olmadığını yoxlayır, ən əsası əsgərlərimizə mənəvi dayaq olurlar. Bilirsiniz, generalın səngərdə olması şəxsi heyətə necə təsir edir, bu, onların inamını artırır, əsgərlərə ruh yüksəkliyi verir. Bizdə bir söz var “sayıb gəlib”. Baxmayaraq ki, atışma gedir, döyüş gedir, artilleriya atəşinə məruz qala bilər, yüksək rütbəli, təcrübəli zabit özünün rahat, hər bir şəraitli kabinetindən çıxıb əsgərin yanına gəlir. Rütbəsindən asılı olmayaraq, onun ürəyi əsgərlə bir döyünür. General, polkovnik, korpusun idarə heytənin nümayəndəsi səngərə, əsgərin yanına gəlir. O əsgərin ki, gecə-gündüz vətənin keşiyində durur”.
"Azərbaycan ərazi bütövlüyünü bərpa etməyə qadirdir"
Müsahibimiz qeyd edib ki, Tovuz döyüşləri bir bölük çərçivəsində gedən mövqe savaşıdır:
“Yəni o döyüşdə korpusun idarə edilməsinə ehtiyac yoxdur. Orada tabur səviyyəsində döyüş gedir. Tabur əlində olan imkanlarla düşmənin o istiqamətdə hər bir təxribatının qarşısını almağa qadirdir. Ancaq buna baxmayaraq, müdafiə nazirinin müavini də, korpus komandiri də orada idi. Bu daha çox hadisələri yerində qiymətləndirib, gedişata hazır olmaq məqsədi daşıyır. O biri tərəfdən də mənəvi məqsəd var. Yəni “əsgər, biz sizinləyik”, “sizi dəstəkləməyə hazırıq”.
Bu gün gedən proseslər göstərdi ki, istər əsgər, istər çavuş, istər zabit, istər yüksək rütbəli general olsun, Azərbaycan ordusu bu gün öhdəsinə düşən tapşırıqları yerinə yetirməyə hazırdır. Azərbaycan Prezidenti, Ali Baş Komandan orudumuz yüksək qiymət verərək dedi ki, “əgər Azərbaycan və Ermənistan ordularını üz-üzə qoysalar, Azərbaycan Silahlı Qüvvələri işğalçıları qısa müddətdə darmadağın edib, ərazi bütövlüyümüzü bərpa etməyə qadirdir. Təəssüflər olsun ki, biz böyük oyunun içərisindəyik, ayrı-ayrı dövlətlərin ikili standartlarına dözməli oluruq”. Ancaq bütün bunlara baxmayaraq, xalqın iradəsi, döyüş bölgəsində gedən proseslər Prezidentin qətiyyəti bütün ölkələrə və onların havadarlarına göstərəcək ki, Azərbaycan dövlətinin səbri tükənmək üzrədir, hər an anti-terror əməliyyatı apararaq, öz torpaqlarımızı düşməndən azad edib ərazi bütövlüyümüzün bərpasına qadirik”.
