Dünyada koronavirus infeksiyasına yoluxanların sayı 14 milyon nəfəri ötüb.
Modern.az pandemiyanın statistikasını aparan Worldometer saytına istinadla xəbər verir ki, iyulun 16-da dünya üzrə koronavirusa rekord sayda – 248 min 914 yoluxma halı aşkarlanıb, 5 min 741 nəfər vəfat edib.
Saytın son məlumatına əsasən, hazırda koronavirus infeksiyasına yoluxanların ümumi sayı 14 milyon 3,7 minə, ölənlərin sayı isə 593,9 minə çatır. Eyni zamanda, 8 milyon 322 min nəfər COVID-19 xəstəliyindən sağalıb.
Qeyd edək ki, Çin hökuməti 2019-cu il dekabrın 31-də ölkənin mərkəzi hissəsində yerləşən Hubey əyalətinin Uxan şəhərində naməlum pnevmoniyanın yayılmağa başladığı barədə Ümumdünya Səhiyyə Təşkilatını məlumatlandırıb. Mütəxəssislər xəstəliyə yeni koronavirusun səbəb olduğunu müəyyən edib. Martın 11-də isə infeksiyasının yayılması pandemiya elan olunub.
