Şuşa qalası alınanda sevindiyim qədər Ramiz Kərəm qalası çökəndə üzüldüm. Dünən Azərbaycanın həqiqi istedad sahibi olan bir şairini itirdik. Ramiz Kərəmin bircə misrasından, bircə şeirindən xəbərdar olanlar onun fitrətən şair olduğunu təsdiqləyərlər. Onu öz sadəliyindən , səmimiliyindən , bir də ədəbi tənqidimizin subyektiv münasibəti ( burada başqa amillər də var) üzündən bu gün geniş ictimaiyyət kifayət qədər tanımır. Onu da etiraf edim ki, R.Kərəmin özü də tanınmaqdan, məşhurlaşmaqdan (bu fikri təsdiq edən gerçək faktlar barədə qismət olsa sonra yazacam) qaçırdı. Ona görə qaçırdı ki, o, həqiqi istedad sahibi idi. Onun bir yolu vardı. Ömrünün sonuna qədər də bu yolla getdi. O, bu dünyada həqiqi şair və əsl insan kimi yaşadı. Təbii və səmimi.”Olduğu kimi göründü, göründüyü kimi oldu”. Onun sözü –poeziyası ilə hərəkəti, davranışı arasında fərq görünmürdü. Hər kəs öz dünyasından çıxış edir. Hər kəs öz dünyasını yazır. Ancaq baxır o dünya necədir. R. Kərəm çox zəngin daxili aləmi, fərqli duyğu-düşüncəsi, özəl ovqatı olan şairlərdən idi.
Çox nadir istedad sahiblərindən idi ki, Tanrı onu istedadla bərabər insanı insanlıq mərtəbəsinə yüksəldən bütün ali dəyərlərlə mükafatlandırmışdır. Etiraf edək ki, bu gün elə ədəbiyyat və sənət adamları var ki, nadir sənət nümunələrinə müəlliflik etsələr də, adam onları görəndə qaçır, onlarla salamməleyk belə etmək istəmir. Ramiz Kərəm özgə bir insan idi. Onunla ötəri münasibətdə olanlar belə bunu təsdiqləyərlər.
R.Kərəm titulsuz, ordensiz-medalsız olsa da, ancaq anadan şair doğulmuşdur. Tam səmimi və bütün məsuliyyətimlə deyirəm ki, o, ədəbiyyatımızda yaşayacaq bir şairdir. Bu məqamda gerçək bir nümunə deyim. Bu günlərdə qardaş Türkiyə Cümhuriyyətində dərc olunan “Hece taşları” aylıq şeir dərgisinin Azərbaycanın Qarabağdakı qələbəsinə həsr olunmuş xüsusi buraxılışında R.Kərəmin ” Zəfər şeiri”də özünə yer almışdır.
İndilikdə onun yaradıcılığından geniş söz açmaq iqtidarında deyiləm.
Ancaq R.Kərəmin yaradıcılığının yaxın gələcəkdə geniş tədqiq olunacağına, poetik nümunələrinin müntəxəbatlara salınacağına əminəm.
Ramiz Kərəm bu gün doğulduğu ata yurdunda- Gədəbəyin Ataxal kəndində doğmalarının yanında Allaha əmanət edilir. Çox təəssüflər olsun ki, onusevənlər məlum səbəblərdən bu törəndə iştirak edə bilmir. Bir dözülməz ağrı da budur...
Xeybər Göyyallı
