“Biz Qarabağ münaqişəsinin həllində birinci dərəcəli rolu Azərbaycan və Ermənistana ayırırıq”. Modern.az Qazaxıstan mətbuatına istinadən xəbər verir ki, bu barədə Qazaxıstanın xarici işlər naziri, ATƏT-in fəaliyyətdə olan hazırkı sədri Kanat Saudbayev Brüsseldə ATƏT-Avropa Birliyi toplantısında bildirib. ATƏT sədri eyni zamanda Minsk qrupu vasitəçilərinin səylərini də qiymətləndirdiklərini deyib. “Hesab edirik ki, münaqişənin nizamlanmasına dair baza prinsiplərinin qəbulunun ləngiməsi danışıqlar prosesinə mənfi təsir edə və münaqişə tərəfləri arasında etimadı tamamilə poza bilər. Buna görə də Qazaxıstan baza prinsipləri üzrə nizamlanmamış məsələlərin razılaşdırılması üçün Azərbyacan və Ermənistana yardım göstərə və bilavasitə bu prosesdə iştirak edə bilər”,-deyə Saudbayev bildirib.
ATƏT sədri hesab edir ki, Qarabağ problemini bütün maraqlı tərəflərin iştirakı ilə birgə səylər əsasında həll etmək olar. “Biz ümid edirik ki, ümumi məqsədləri əsas götürərək ATƏT və Avropa İttifaqı, sıx qarşılıqlı hərəkət və birgə səyləri koordinasiya yolu ilə münaqişənin həllində müəyyən uğurlar əldə edə bilərlər”,-deyə fəaliyyətdə olan ATƏT sədri bildirib.
Saudbayev Türkiyə –Ermənistan münasibətlərinin normallaşması prosesini də məmnunluqla qarşıladıqlarını deyib. O, bu prosesi Qafqazda ən önəmli hadisələrdən biri kimi dəyərləndirib. Onun sözlərinə görə, hər iki ölkə ilə dostluq, tərəfdaşlıq əlaqələrinə malik olan Qazaxıstan prosesin inkişaf etdirilməsi üçün maksimum səylər göstərəcək.