Modern.az saytının “Bir şəklin tarixçəsi” rubrikasında təqdim etdiyi bu foto 22 il əvvələ aiddir.
Zaman 1999-cu il.., məkan İstanbul… ATƏT-in Zirvə görüşü…
Rusiyanın birinci prezidenti Boris Yeltsin və Türkiyə prezidenti Süleyman Dəmirəl ayaqüstü söhbət edirlər. Yəqin ki, onlara tərcüməçilik edən üçüncü şəxsi də yaxşı tanıdınız – o zaman Rusiyanın Türkiyədəki səfirliyinin 1-ci katibi vəzifəsində işləyən Dmitri Peskov...
O Peskov ki, hazırda Rusiya siyasətinin üzdə olan əsas simalarından biridir... Prezident Kremlin mətbuat katibi – prezident Vladimir Putinin sözçüsü Dmitri Peskov bəlkə də dövlət başçısından sonra mətbuatda ən çox görünən siyasətçilərdəndi..
Məhz o görüşdə Peskovun ruscadan türkçəyə tərcüməçilik məharəti Boris Yeltsinin çox xoşuna gəlmişdi. Bu məharət onun sonrakı karyerasına müsbət təkan verdi.
Söhbət əsnasında Yeltsinlə Dəmirəl arasındakı maraqlı dialoq diqqət çəkmişdi.
Yeltsin: "Zati-alinizi uzun müddət görə bilmədim".
Dəmirəl: "Türkiyəyə gəlməyinizdən çox şadıq, cənab prezident. Sizi dəfələrlə dəvət etdim. Və nəhayət gəldiniz".
Yeltsin: “Amma mən Sizi daha çox dəvət etdim. Siz isə gəlmədiniz”.
Dəmirəl: "Mən gəldim. 1992-ci ildə gəldim”.
Yeltsin: “İndi, yeni eranın astanasında Avropadakı birgə səylərimizin adı “zərər vermə” prinsipi üzərində qurulmalıdır. Məhz buna görə biz başqa texnologiya – səbrlə qarşılıqlı münasib həll variantı tapmaq texnologiyası təklif edirik. Xüsusən, qeyri-standart həll varinatları gözdən keçirilməlidir”.
Yeltsin Rusiyada təxminən 10 il hakimiyyətdə olsa da, Türkiyəni rəsmi olaraq heç ziyarət etməmişdi.
A.Qorxmaz
