Özəl tibb müəssisələrində fəaliyyət göstərən həkim-mütəxəssislərin pasiyentlərə tibbi xidməti zamanı xəstəliklərin diaqnostikası və müalicəsi üzrə tələblərə (müayinə və müalicə protokoluna) əməl edilməsinə nəzarətin gücləndirilməsi vacibdir.
Modern.az xəbər verir ki, bu barədə Azərbaycan Respublikasının İnsan Hüquqları üzrə Müvəkkilinin (Ombudsmanın) 2020-ci il üzrə məruzəsində qeyd edilib. Məruzədə bildirilir ki, Ombudsman pasiyentlərin hüquqlarının etibarlı təmin edilməsi məqsədilə “Pasiyentlərin hüquqlarının müdafiəsi haqqında” qanunun qəbulunun sürətləndirilməsini zəruri hesab edir.
Ombudsman hesab edir ki, ictimai səhiyyənin səmərəliliyinin gücləndirilməsi, uşaq və gənclərin narkomaniya və digər zərərli vərdişlərdən qorunması üçün sağlam həyat tərzinin təbliği üzrə layihə və proqramların hazırlanıb tətbiq edilməsi, eyni zamanda sağlamlıq, idman və digər profilaktik tədbirlərin genişləndirilməsi, xüsusilə asudə vaxtın təşkili istiqamətində müsbət təcrübəyə əsaslanmaqla müvafiq layihələrin həyata keçirilməsi zəruridir.
