Azərbaycanda davam edən COVID-19 əleyhinə vaksinasiya prosesinə xarici ölkələrin səfirliklərinin əməkdaşları da cəlb olunacaqlar.
Bu barədə Modern.az-ın sorğusuna cavabında Xarici İşlər Nazirliyinin (XİN) Mətbuat xidməti idarəsinin rəisi Leyla Abdullayeva bildirib. Mətbuat katibi qeyd edib ki, Azərbaycan hökuməti ölkəmizdə akkreditə olunan diplomatik nümayəndəlik əməkdaşlarının COVID-19 pandemiyası əleyhinə peyvənd olunması üçün bütün diplomatik korpusa müvafiq müraciət göndərib:
“Bu müraciətə uyğun olaraq diplomatik nümayəndəliklər peyvənd olunub-olunmamaqla bağlı qərarlarını veriblər”.
Azərbaycanın xaricdəki diplomatik nümayəndəliklərinə gəlincə isə Leyla Abdullayevanın sözlərinə görə, bəzi ölkələr tərəfindən eyni təcrübədən istifadə olunaraq, diplomatlara peyvənd olunmaq təklifi göndərilib:
“Amma qeyd etmək istərdik ki, xarici ölkələrdə peyvənd olunmayan diplomatlarımızın, əlbəttə Azərbaycana gələrək, burada peyvənd olunmaq imkanları var”.