Arxiv
12 May 2021, 17:32 | QARABAĞ
Azərbaycan Ordusu Gorus istiqamətində 3 kilometr irəliləyib? - ŞƏRH

Bu gün Ermənistan mediası Azərbaycan Ordusunun dövlət sərhədinin demarkasiyası nəticəsində Gorus istiqamətində - Qaragöl tərəfdə 3 kilometr irəlilədiyini yazıb.


Modern.az
-ın məlumatına görə, informasiyanı şərh edən siyasi icmalçı Asif Nərimanlı deyib ki, Qaragöl Laçın və Gorus rayonu arasında yerləşir, 1987-ci ilin 17 oktyabrında Azərbaycan və Ermənistan SSR-in birgə qərarı ilə yaradılmış Qaragöl Dövlət Təbiət Qoruğuna daxildir. Ermənistan Laçını işğal etdikdən sonra dövlət sərhədini irəli çəkib, indi Azərbaycan dövlət sərhədini bərpa edir.


“Ermənilərin hay-küy salmasının səbəbi Gorusun içməli suyunun böyük hissəsinin bu göldən təmin edilməsidir. Sərhədin bərpası ilə Gorus rayonu ciddi su problemi ilə üzləşə bilər, o cümlədən, illərdir qurulan infrastuktur əllərindən çıxacaq. Bununla yanaşı, Azərbaycan ordusunun Sisian rayonuna nəzarəti güclənə bilər. Erməni ekspertlər bildirir ki, Azərbaycanın Sisian rayonuna nəzarətinin güclənməsi Süniki (Zəngəzur) şimaldan nəzarətə alması deməkdir”.

Ekspert deyir ki, Qaragöl istiqamətində sərhədin demarkasiyasının niyə indi başlamasının üç səbəbi mümkündür:


“Birincisi: bölgənin çətin relyefi qış aylarından mövqeləri bərpa etməyə imkan vermirdi;


İkincisi: müharibədən sonra başlanan demarkasiya işləri həmin bölgəyə indi çatır;


Üçüncüsü: Lavrovun səfərində demarkasiya işlərinin sürətlənməsi və Ermənistanın yarada biləcəyi problemlərin qarşısının Rusiya tərəfindən alınması ilə bağlı razılıq əldə olunub.


Rusiya hərbçilərinin bölgədə prosesi nizamladıqları haqda məlumatlar var. Bunun fonunda erməni mənbələr Tavuş istiqamətində də hansısa proseslərin getdiyini yazır. Söhbət Qazaxın işğal altında olan 7 rayonundan gedir. Bölgədə kommunikasiyanın bərpası prosesində bu kəndlərin də taleyinin müəyyənləşməsi gözləniləndir”.

 

BU KATEQORİYADAN OLAN DİGƏR XƏBƏRLƏR
+ Arxiv
SORĞU AVRO-2020-nin qalibi hansı komanda olacaq?