Rusiya Federasiyasının ərazisində qeyri-qanuni yaşayan miqrantlarla bağlı bu ölkənin Daxili İşlər nazirinin birinci müavini, polis general-polkovniki Aleksandr Qorovoyun 16 aprel 2021-ci il tarixli bəyanatı ilə əlaqədar Səfirlik bu kateqoriyaya aid vətəndaşlarımıza müraciət edərək aşağıdakıları bildirir.
Bu barədə Modern.az-a Azərbaycanın Rusiyadakı səfirliyindən məlumat verilib.
Bildirilib ki, Azərbaycan Respublikasının vətəndaşları cari ilin 15 iyun tarixinədək Rusiya ərazisində öz hüquqi vəziyyətlərini nizamlamaq məqsədi ilə faktiki yerləşmə yerlərində, bölgə və şəhərlərdə Daxili İşlər Nazirliyinin ərazi orqanlarının miqrasiya məsələləri üzrə bölməsinə ən qısa zamanda müraciət etməlidirlər.
Rusiya qanunvericiliyi ilə müəyyən edilmiş müvafiq cərimə (təxminən 5 000 rubl) və ya rüsumun ödənilməsindən sonra onların Rusiya ərazisində statusunun leqallaşdırılması aparılacaqdır.
Səfirlik Rusiyada olan vətəndaşlarımıza qısa müddət ərzində aidiyyəti üzrə müraciət etməyi tövsiyə edir.
