Sabiq baş prokuror və eks-səfir Eldar Həsənov barəsində olan cinayət işinə Bakı Ağır Cinayətlər Məhkəməsində hansı hakimin baxacağı məlum olub.

Modern.az xəbər verir ki, bu barədə onun vəkili Adəm Məmmədov bildirib. Vəkil deyib ki, sabiq baş prokuror və eks-səfirin işi hakim Əfqan Hacıyevin icraatına verilib.

Qeyd edək ki, Bakı Ağır Cinayətlər Məhkəməsinin hakimi Əfqan Hacıyev bir sıra qalmaqallı işlərə sədrlik edib. Məsələn, Gəncənin keçmiş icra başçısı Elmar Vəliyevə qarşı sui-qəddə ittiham olunan Yunis Səfərov və daha 11 nəfərin işi üzrə məhkəmə prosesi onun rəhbərliyilə yekunlaşıb. Ə.Hacıyev Azərbaycanda həbsdə olan Ermənistan vətəndaşlarından ibarət terrorçu dəstənin işinə də baxan hakim kimi məşhurlaşıb.
Bundan başqa, "Yeni Klinika”nın sabiq direktoru Pərviz Abbasov, mədəniyyət nazirinin keçmiş müavini Rafiq Bayramovun məhkəmə işlərinə də o baxıb.

Xatırladaq ki, sabiq səfir E.Həsənov barəsində Baş Prokurorluğun İstintaq İdarəsində aparılan cinayət işinin istintaqı avqustun 16-da tamamlanıb.
 

Baş Prokurorluğun məlumatına görə, Eldar Həsənovun Azərbaycan Respublikasının Rumıniya, Serbiya Respublikası, Bosniya və Herseqovina və Monteneqroda fövqəladə və səlahiyyətli səfiri kimi fəaliyyət göstərdiyi 2010-2020-ci illərdə qabaqcadan əlbir olan bir qrup şəxs halında 17.931.316 manat (16.893.868 avro) pul vəsaitini səfirliklər üçün yeni inzibati binaların alınması, habelə təmir-tikinti işləri ilə əlaqədar israf etmə və mənimsəməsinə, cinayət yolu ilə əldə edildiyini bilə-bilə 11.804.661 manat (11.156.716 avro) məbləğində pul vəsaitini leqallaşdırmasına, rəsmi sənədlərə bilə-bilə yalan məlumatlar daxil edərək vəzifə saxtakarlığı törətməsinə, vəzifəli şəxs kimi vəzifə səlahiyyətlərindən sui-istifadə etməklə dövlətin qanunla qorunan mənafelərinə ağır nəticələrə səbəb olan 327.373 manat (180.728 avro) məbləğində mühüm zərər vurmasına və dövlət büdcəsinin xeyli miqdar təşkil edən 192.387 manat (101.761 avro) pul vəsaitindən təyinatı üzrə istifadə etməməsinə əsaslı şübhələr müəyyən edilib.

Buna görə, Eldar Həsənova Azərbaycan Respublikası Cinayət Məcəlləsinin 179.3.2 (mənimsəmə və ya israfetmə, külli miqdarda törədildikdə), 193-1.3.2 (cinayət yolu ilə əldə edilmiş pul vəsaitlərini və ya digər əmlakı leqallaşdırma, külli miqdarda törədildikdə) 308.2 (vəzifə səlahiyyətlərindən sui-istifadə etmə, ağır nəticələrə səbəb olduqda) 308-1.1 (Dövlət büdcəsinin vəsaitindən təyinatı üzrə istifadə etməmə) və 313-cü (vəzifə saxtakarlığı) maddələri ilə ittiham elan olunub. 

Eldar Həsənovun birgə ittiham olunduğu cinayətlərin digər iştirakçıları barəsində cinayət işi ayrıca icraata ayrılaraq istintaqı davam etdirilir.