Arxiv
21 Sentyabr 2021, 15:38 | AKTUAL
Vidadi Mirkamalın pensiya ilə bağlı şikayətinə rəsmi REAKSİYA

“Vidadi Mircəlil oğlu Mirkamalın pensiyasının məbləği ilə bağlı sosial mediadakı şikayəti əsassızdır”.

 

Modern.az xəbər verir ki, bunu Dövlət Sosial Müdafiə Fondunun (DSMF) İctimaiyyətlə əlaqələr şöbəsinin müdiri Rəşad Mehdili bildirib.

 

R.Mehdilinin sözlərinə görə, onun sosial sahədə aparılan islahatlarla bağlı ittihamları həqiqətdən uzaq, heç bir əsası olmayan qarayaxmadan başqa bir şey deyil:

 

“Vidadi Mirkamal 2008-ci ildən sabiq hakim kimi II dərəcəli əlilliyə görə əmək pensiyası alıb. Özünün müraciəti əsasında bu ilin aprel ayında onun pensiyasının növü dəyişdirilib. Yəni əlilliyə görə aldığı pensiya yaşa görə pensiya ilə əvəzlənib. Bu zaman yenə də özünün müraciətinə əsasən, onun pensiyasının yenidən hesablanması aparılıb”.

 

Qurum rəsmisi deyib ki, araşdırma zamanı ona 2008-ci ildən 2020-ci ilin dekabrınadək ayda 2762 manat pensiya ödənilməli olduğu halda, 3474 manat pensiya ödənildiyi aşkarlanıb:

 

“Beləliklə, 12 ildən çox müddətdə ona ümumilikdə 319,8 min manat pensiya ödənilməli olduğu halda 422,8 min manat, yəni 103 min manat artıq pul ödənildiyi müəyyən edilib.

 

Qanunvericiliyin tələbinə əsasən, belə halda artıq ödənilmiş vəsait şəxsin alacağı sosial ödənişdən tutulmalıdır.

 

Vidadi Mirkamal vəsaitin onun pensiyasından tutulmasına razılıq vermədiyinə görə, Dövlət Sosial Müdafiə Fondunun Mərkəzi Filialının 5 may 2021-ci il tarixli “Artıq ödənilmiş vəsaitin büdcəyə bərpa edilməsi haqqında” Qərarı rəsmi məktubla ona göndərilib, 1 iyun 2021-ci tarixli Qərarla isə Xətai rayon İcra və Probasiya şöbəsinə müraciət edilib.

 

Pensiya məbləğinin yenidən artırılmasına dair onun məhkəmə iddiasına da baxılıb, Bakı İnzibati Məhkəməsinin müvafiq Qərar və Qərardadı ilə iddia təmin edilməyib”.

 

Qeyd edək ki, Vidadi Mirkamal Milli Şuranın Koordinasiya Mərkəzinin üzvüdür.

BU KATEQORİYADAN OLAN DİGƏR XƏBƏRLƏR
+ Arxiv