12-15 yaşlı yeniyetmələrin COVID-19 əleyhinə vaksinasiyası könüllü olduğundan hələlik regionlarda mərkəzlər yaradılmayıb.
Bu barədə Modern.az-ın sorğusuna cavab olaraq Səhiyyə Nazirliyindən məlumat verilib. Nazirlikdən bildirilib ki, regionlarda yaşayan valideynlər həmin yaşdakı övladlarının vaksin olunmasını istəyirsə, paytaxtda yerləşən Bakı Sağlamlıq Mərkəzinə müraciət edə bilərlər:
“Vaksinasiya mərkəzləşdirilmiş qaydada Bakı Sağlamlıq Mərkəzində həyata keçiriləcək. Rayonlarda yaşayan şəxslər də bununla bağlı Bakı Sağlamlıq Mərkəzinə müraciət etməlidirlər”.
Qeyd edək ki, Səhiyyə Nazirliyinin müvafiq qərarına əsasən, müvafiq tibbi göstərişlərə və hər iki valideynin razılığına əsasən 12-15 yaşı tamam olmuş yeniyetmələrə COVID-19 xəstəliyi əleyhinə mRNT Pfizer (“Comirnaty”) peyvəndi vurula bilər. 12-15 yaşlı yeniyetmələrin vaksinasiyası mərkəzləşdirilmiş şəkildə Bakı Sağlamlıq Mərkəzində aparılacaq.
