Modern.az

Cavanşir Feyziyev Çingiz Abdullayevin müdafiəsinə qalxdı

Cavanşir Feyziyev Çingiz Abdullayevin müdafiəsinə qalxdı

3 Noyabr 2021, 11:26

Milli Məclisin deputatı Cavanşir Feyziyev sosial şəbəkələrdə tənqidlərə tuş gələn Yazıçılar Birliyi sədrinin 1-ci müavini, Xalq yazıçısı Çingiz Abdullayevi müdafiə edib.

Modern.az-ın məlumatına görə, deputat bəzi media orqanlarında və sosial şəbəkələrdə Çingiz Abdullayev barəsində yazılan tənqidləri yazıçıya qarşı aparılan qarayaxma kampaniyası adlandırıb:

“Ömründə Çingiz Abdullayevin bir kitabını belə oxumamış bəzi adamların Azərbaycanın müasir mədəniyyətində silinməz iz qoymuş böyük bir şəxsiyyət haqqında bu qədər qərəzli danışması hörmətli ədibimizə qarşı bədxah insanlar tərəfindən məqsədli şəkildə qaralama kampaniyasının təşkil olunduğundan xəbər verir. Bu üzdəniraq kampaniya öz ölkəsi ilə fəxr edən hər bir azərbaycanlının qəlbində onu təşkil edənlərə qarşı yalnız ikrah və nifrət hissləri yarada bilər.

Birincisi, Çingiz Abdullayevin çıxışında Azərbaycan cəmiyyətini incidə biləcək və ya cəmiyyətin hər hansı bir üzvünün heysiyyətinə toxuna biləcək bir söz belə yoxdur. Çingiz Abdullayev həqiqəti söyləyib və həqiqət kimi isə narahat edirsə onun həqiqətə qarşı təşkil etdiyi kampaniya da cəmiyyəti bir o qədər narahat etməlidir.

İkincisi, Çingiz Abdullayev çağdaş Azərbaycan ədəbiyyatının, bütövlükdə milli müasir mədəniyyətimizin dünya miqyasında parlayan bir ulduzudur. Çingiz Abdullayevə atılan şər-böhtan hər bir azərbaycanlının şərəfinə və qüruruna atılan ləkə kimi qəbul olunmalıdır. Çingiz Abdullayevə qarşı düzənlənən hər bir hücum çağdaş mədəniyyətimizə qarşı təcavüz cəhdi kimi başa düşülməlidir. Dünya miqyaslı bir ziyalımıza yönəlmiş qərəzli hücumların qarşısında durmaq isə xalq və millət olaraq olaraq gələcək nəsillərimizə ötürə biləcəyimiz dəyərli bir örnəyi və qiymətli bir mirası qorumaq deməkdir. Nizamini, Nəsimini, Füzulini, Axundzadəni, Cavidi, Vurğunu, Vahabzadəni və adlarını çəkə biləcəyimiz yüzlərlə digər fikir və söz sahiblərimizi qoruduğumuz kimi Çingiz Abdullayevi də bədxahların şərindən qorumağı bacarmalıyıq. Zehni və əqidəsi ilə, əməyi və uğurları ilə, Vətən sevgisi və fədakarlığı ilə böyük sayılanlar xalqın və millətin övladlarıdır. Millət öz böyük övladlarına sahib çıxmağı bacarmalıdır.

Çingiz Abdullayev Azərbaycan cəmiyyəti üçün, bu günün və gələcəyin Azərbaycanlıları üçün əvəzsiz bir mədəni dəyər olmaqla milli qürur mənbəyimizdir. Mədəni dəyərlərimizi və milli qürurumuzu qorumaq isə hər birimizin mənəvi borcumuzdur!”.

 
Xatırladaq ki, Çingiz Abdullayev bir neçə gün öncə Birinci Qarabağ Müharibəsi barədə verdiyi açıqlamaya görə qınanılıb. Bu açıqlamasında o, Birinci Qarabağ Müharibəsi zamanı ermənilərin sovet qoşunlarının gücü ilə torpaqlarımızı işğal etdiyini bildirmişdi. Çıxış edərkən "Birinci Qarabağ Müharibəsi olmayıb" ifadəsi işlədən yazıçı sonradan fikirlərinin səhv anlaşıldığını desə də, onu tənqid edənlər daha da çoxalıb.

Telegram
Hadisələri anında izləyin!
Keçid et
Ukraynadan hər kəsi şok edən xəbər: Azərbaycanlı jurnalist vəfat etdi