Türkiyə lirəsi sürətlə dəyərdən düşür. Lirənin bu qədər ucuzlaşaması tarixi rekorddur. Hazırda 1 ABŞ dolları 13 Tl-dir.

Lirənin rekord səviyyədə ucuzlaşması Azərbaycan və Türkiyə arasındakı ticarət əlaqələrinə necə təsir edəcək? Türk malları ucuzlaşacaqmı?

Modern.az-ın bu sualını cavablandıran iqtisadçı Natiq Cəfərli bildirib ki, məntiqlə, bazar tələblərinə uyğun olaraq, Türkiyə məhsulları Azərbaycanda ucuzlaşmalıdır:

“Türkiyədə lirənin dəyərdən düşməsi prosesi bir aydan çoxdur ki, başlayıb. Son iki gündə daha da sürətlənib və tarixi rekord həddindədir. 13 lirə 1 dollardır, tarixdə belə bir şey olmayıb. İki ölkə arasındakı ticarət dövriyyəsini nəzərə alsaq lirənin ucuzlaşması Azərbaycana Türkiyədən idxalı sitimullaşdıracaq. Türkiyədən daha çox mal və məhsulun Azərbyacana gətirilməsinə səbəb olacaq”.

Ekspert deyib ki, türk lirəsinin dəyərdən düşməsi Türkiyədən mal gətirilməsini daha cəlbedici edir:

“Düşünürəm ki, bu, yeni il qabağı daha çox sürətlənəcək. Tələbi də nəzərə alsaq, daha çox mal və məhsulun Azərbaycana gətirilməsi gözlənilir. Məntiqlə Azərbaycanda Türk məhsullarının qiyməti də düşməlidir. Təəssüf ki, bu prosesi hələ görmürük.  Ümid edirəm ki, bu rəqabətli mühit yaransa, daha çox oyunçular Türkiyədən məhsul gətirməyə başlasa, bir müddətdən sonra məhsulların qiymətində endirimlərin şahidi olacağıq”.