Türkiyə prezidenti Abdullah Gül ABŞ Nümayəndələr Palatasının Xarici Əlaqələr Komitəsinin “erməni soyqırımı” ilə bağlı qəbul etdiyi qərara münasibət bildirib. O, deyib ki, qərarı məqbul hesab etmir və təəssüflə qarşılayır: “Bu səsvermənin hər sahədə səbəb ola biləcəyi mənfi nəticələrə görə məsuliyyəti Türkiyə daşımayacaq”. Prezidentin sözlərinə görə, qərar Türkiyə-Ermənistan münasibətlərini daha da pisləşdirəcək.
Abdullah Gül hesab edir ki, qərar Cənubi Qafqazda sülh və sabitliyin bərqərar olması, xalqlar arasında daimi dostluq münasibətlərinin qurulması istiqamətində göstərilən səylərə zərər verəcək: “Siyasi maraqlar güdülməklə qəbul edilən qərarı tarixə və tarix elminə qarşı haqsızlıq kimi qiymətləndirirəm”.
