Ərazisinin 20 faizi işğal altında olan, düşmən ölkə ilə hərbi və informasiya müharibəsi aparan Azərbaycan Respublikası daim xarici xüsusi xidmət orqanlarının kəşfiyyat-təxribat və digər pozuculuq əməllərinə məruz qalır. Lakin Milli Təhlükəsizlik Nazirliyinin (MTN) kəşfoyyat fəaliyyətinin daha məqsədyönlü və effektiv qurulması ölkəmizə qarşə təxribat əməllərinin puça çıxması ilə nəticələnir. 2009-cu ildə Milli Təhlükəsizlik Nazirliyinin (MTN) Baş İstintaq İdarəsi tərəfindən ümumilikdə 103 cinayət işinin istintaqı aparılıb. Modern.az-a verilən məlumata görə, istintaqı aparılmış cinayət işlərindən 190 şəxs barəsində 39 iş (dövlətə xəyanət, casusluq, qanunvericilikdə nəzərdə tutulmayan silahlı birləşmə yaratma, kompüter informasiyasına qanunsuz daxil olma, qaçaqmalçılıq, terrorçuluq barədə bilə-bilə yalan məlumat vermə, qanunsuz olaraq odlu silah əldə etmə, satma, saxlama, daşıma maddələri ilə) üzrə müvafiq aktlar tərtib edilərək məhkəməyə göndərilib. Ötən il Azərbaycan Respublikasına, o cümlədən Silahlı Qüvvələrə qarşı xarici xüsusi xidmət orqanlarının kəşfiyyat-təxribat və digər pozuculuq fəaliyyəti əleyhinə mübarizə işi istiqamətində keçirilmiş əks-kəşfiyyat və əməliyyat-axtarış tədbirləri nəticəsində xarici xüsusi xidmət orqanlarının tapşırığı ilə Azərbaycanda kəşfiyyat-agentura fəaliyyəti ilə məşğul olan 16 hərbi qulluqçu və 9 mülki şəxs ifşa olunub. Onlar barəsində Azərbaycan Respublikası Cinayət Məcəlləsinin “Dövlətə xəyanət”, “Casusluq” və “Terrorçuluq” maddələri ilə cinayət işləri başlanıb. Onlardan 11 hərbi qulluqçu və 6 mülki şəxs məhkəmənin hökmü ilə müxtəlif müddətlərə azadlıqdan məhrum edilib. 4 hərbi qulluqçu və 2 mülki şəxs barəsində “Dövlətə xəyanət” maddəsi ilə başlanmış cinayət işinin istintaqının davam etdirildiyi bildirilir.
Modern.az