“Eurovision” mahnı müsabiqəsinin bukmekirləri bu ilin mayında Osloda keçiriləcək 55-ci “Eurovision” müsabiqəsində Azərbaycanın birinci olacağına inanırlar. Modern.az xəbər verir ki, www.oddschecker.com/specials/tv/eurovision saytında bukmekirlərin səsverməsi yerləşdirilib. Səsverməyə əsasən, Azərbaycan 39 ölkə arasında birinci yerdədir. Bukmekirlərin səsverməsinə görə, Ermənistan 4-cü, Türkiyə isə 12-ci yerdədir.Martın ilk ongünlüyündən başlanan səsvermədə Azərbaycan ilk gündən birinci yerdədir.
Qeyd edək ki, bu ilin mayında Norveçin paytaxtı Osloda keçiriləcək “Eurovision-2010” mahnı müsabiqəsində Azərbaycanı Səfurə Əlizadə “Drip drop” mahnısı ilə təmsil edəcək. Azərbaycan təmsilçisi mayın 27-də keçiriləcək II yarımfinalda 16 ölkənin təmsilçiləri ilə finala çıxmaq uğrunda mübarizə aparacaq.
Mayın 25-də müsabiqənin I yarımfinalı, 29-da isə finalı keçiriləcək.