Həkimlərin son araşdırmalarına görə, 6 saatdan az yatmaq vaxtsız ölüm riskini artırır. Modern.az xarici mətbuata istinadən xəbər verir ki, Britaniya alimləri aparılmış 16 tədqiqatın nəticələrinə əsasən belə bir qənaətə gəliblər. 25 il ərzində aparılmış tədqiqat işlərinə 1,5 milyon insan cəlb olunub. Böyük Britaniya, Amerika, Avropa və Çində 100 mindən artıq vaxtsız ölüm faktı qeydə alınıb.
Bütün əldə olunmuş nəticələri tutuşduran ekspertlər 6 saatdan az yuxu ilə insanın həyatdan vaxtsız köçməsi arasında təkzibolunmaz əlaqə tapıblar. Məlumata görə, 6 saatdan az yatanlar vaxtsız ölüm riski ilə daha artıq üzləşirlər. Tədqiqatlar gedişində həm də vaxtsız ölüm və 9 saatdan artıq yatmaq arasında da bağlılıq təhlil olunub. Uzunsürən yuxu hər hansı ciddi xəstəliyin əlaməti kimi izah olunub.
“Əgər qeyri-davamlı yuxu səhhətin pis durumunu xarakterizə edirsə, onda uzun sürən yuxu xəstəliyin göstəricisidir”,-deyə professor Françesko Kappuçio bildirir. Alim qeyd edir ki, hazırda insanların orta yuxu saatı tədricən azalır. Bu tam məşğuliyyət şəratində olan insanlar arasında yayılmış modeldir. Bu sosial təzyiqlə izah oluna bilər. Digər tərəfdən səhhətimizin pisləşməsi çox vaxt yuxuya ayrılan saatların artması ilə müşayiət olunur. Beləliklə də
sutkada sistemli olaraq 6 saatdan 8 saata qədər yuxulamaq sağlamlıq üçün optimal hesab oluna bilər.