Rafael Hüseynov Parisə…
Modern.az saytı xəbər veriri ki, millət vəkili Rafael Hüseynov Avropa Şurası Parlament Assambleyasının komitə iclaslarında iştirak etmək üçün mayın 27-də Parisə yola düşəcək.
Qurumun Ətraf mühit, kənd təsərrüfatı, yerli və regional işlər komitəsinin iclasında Venesuelada demokratiyanın vəziyyəti, Aralıq dənizi hövzəsində ətraf mühitin mühafizəsi, meşələrin hazırkı durumu və gələcəyi, silahlı münaqişələrin, həmçinin hərbi tullantıların ətraf mühitə təsiri məsələləri müzakirə olunacaq.
Təşkilatın Hüquqi işlər və insan hüquqları üzrə komitəsinin gündəliyinə Şimali Qafqazda inan haqlarının pozulması halları, bununla bağlı hüquqi müdafiə tədbirləri, ekstremizm əleyhinə mübarizə və digər məsələlər daxil edilib. Tədbirlərdə deputat müzakirəyə çıxarılan məsələlər barədə öz fikirlərini açıqlayacaq.
Səfər iyunun 1-də başa çatacaq.
Fuad Muradov və Rövşən Rzayev Tallinə...
Mayın 27-28-də Tallində “Azərbaycanın Avropaya inteqrasiyasında Baltikyanı ölkələrin rolu” mövzusunda keçiriləcək konfransda Milli Məclisin deputatları Rövşən Rzayev və Fuad Muradov iştirak edəcəklər.
Estoniyada Azərbaycan Mədəniyyət Mərkəzinin Estoniya-Azərbaycan parlament dostluq qrupu ilə birgə təşkil etdiyi bu tədbirə Litva, Latviya və Estoniyanın yüksək vəzifəli dövlət nümayəndələri, bu ölkələrin parlament üzvləri, Baltikyanı Azərbaycan icmalarının nümayəndələri qatılacaq.
Konfransın keçirilməsində məqsəd Azərbaycanın Avropaya inteqrasiyasının intensivləşməsinə, dövlətlərarası, parlamentlərarası siyasi, iqtisadi, mədəni əməkdaşlığın daha da genişləndirilməsinə yardım etməkdən ibarətdir.
Tədbir çərçivəsində “Avropa-Azərbaycan Parlament nümayəndələrinin Məşvərət Şurası”nın yaradılması da nəzərdə tutulub.
Ziyafət Əsgərov, Siyavuş Novruzov, Məlahət İbrahimqızı və Tahir Süleymanov Riqaya...
Milli Məclis sədrinin birinci müavini, parlamentin NATO PA-dakı daimi nümayəndə heyətinin rəhbəri Ziyafət Əsgərovun başçılıq etdiyi nümayəndə heyəti mayın 27-dən iyunun 2-dək Latviyada NATO Parlament Assambleyasının yaz sessiyasında iştirak edəcək.
Nümayəndə heyətinin tərkibinə deputatlardan Siyavuş Novruzov, Məlahət İbrahimqızı və Tahir Süleymanov daxildirlər.
Riqa şəhərində keçiriləcək toplantıda Əfqanıstanda, Qərbi Balkanlarda vəziyyət, NATO – Rusiya strateji tərəfdaşlığının inkişafı, nüvə təhlükəsizliyi və raketdən müdafiə, qlobal iqlim dəyişiklikləri, enerji təhlükəsizliyi, iqtisadi böhranın nəticələri, yoxsulluğun aradan qaldırılması və digər məsələlər müzakirə olunacaq.
Modern.az
