Füzuli rayonunun Horadiz şəhərində Azərbaycanın suverenliyi, torpaqlarımızın müdafiəsi uğrunda gedən döyüşlərdə qəhrəmanlıq göstərərək şəhid olmuş füzulili Milli Qəhrəmanların ailələri ilə görüş keçirlib.
Modern.az-ın məlumatına görə, Milli Qəhrəmanlara göstərilən diqqət və qayğının, ehtiramın bariz nümunəsi kimi Horadiz şəhərində “Qəhrəmanlar parkı” salının, Parkda 6 nəfər Milli Qəhrəmanın şərəfinə abidə kompleksi ucaldılıb.
Noyabrın 28-də havanın yağışlı olmasına baxmayaraq, yüzlərlə füzulili Horadiz şəhərinin giriş hissəsində - Bayraq meydanının yaxınlığında salınmış “Qəhrəmanlar parkın”a toplaşıblar.
Qəhrəmanlar parkının açılış mərasimində Füzuli rayon İcra Hakimiyyətinin başçısı Alı Alıyev, idarə, müəssisə və hüquq-mühafizə orqanlarının rəhbərləri, Milli Qəhrəmanların ailə üzvləri, rayon ictimaiyyətinin nümayəndələri abidə önünə gül-çiçək dəstələri qoyub, şəhidlərin xatirəsini bir dəqiqəlik sükutla yad ediblər.
Sonra Parkın açılış mərasimi keçirilib.
Rayon İcra Hakimiyyətinin başçısı Alı Alıyev Milli Qəhrəmanlara Azərbaycan Prezidenti cənab İlham Əliyevin diqqət və qayğısından danışıb, şəhidlərin torpaqlarımızın müdafiəsi yollundakı şərəfli xidmətlərinin heç zaman yaddan çıxmayacağını bildirib.
Tədbir əsas hissəsi Heydər Əliyev Mərkəzində davam edib. İcra başçısı 6 nəfər Milli Qəhrəmanın keçdiyi ömür yolu barədə ətraflı məlumat verib.
Alı Alıyev qeyd edib ki, Ermənistan-Azərbaycan, Dağlıq Qarabağ münaqişəsi nəticəsində rayon üzrə 1000 nəfərə yaxın füzulili şəhid olub, 1340 nəfər yaralanıb və girov götürülüb. Şəhidlərdən 6 nəfəri Azərbaycan Respublikasının Milli Qəhramanı adına layiq görülüb. İşğal nəticəsində rayonun madii-mədəniyyət abidələri məhv edilib, rayona ümumilikdə 6 milyard dollara yaxın ziyan dəyib.
Alı Alıyev bildirib ki, bu gün hər bir füzulilinin ən böyük arzusu işğal olunmuş torpaqlarımızın azad olunması və bayrağımızın Dağlıq Qarabağda dalğalanmasıdır:
“Bunun üçün hər birimiz üzərimizə düşən vəzifələri layiqincə yerinə yetirməliyik. Mən inanıram ki, o gün uzaqda deyil və biz Ali Baş Komandan İlham Əliyevin rəhbərliyi altında torpaqlarımızı işğaldan azad edəcəyik”.
Görüşdə Milli Qəhrəmanların ailə üzvləri, Qarabağ müharibəsi iştirakçıları çıxış edib, şəhidlərə hörmət və ehtiramlarını bildiriblər.
Rayon İcra Hakimiyyətinin başçısı tədbirə yekun vurub, bu cür görüşlərin gənclərin vətənpərvərlik ruhunda tərbiyyə olunmasında xüsusi rol oynadğını qeyd edib.
Milli Qəhrəmanların ailələrinə rayon İcra Hakimiyyəti tərəfindən hədiyyələr verilib.
Tədbir rayonun mədəniyyət kollektivlərinin konsert proqramı ilə tamamlanıb.